И додека НАТО истакнува дека не претставува никаква закана за Русија, рускиот претседател Владимир Путин постојано се жали на проширувањето на НАТО, кое делумно го искористи за да се обиде да ја оправда руската инвазија на Украина
Европската Унија се милитаризира со рекордно темпо, има многу мала разлика меѓу ЕУ и НАТО, изјави министерот за надворешни работи на Русија, Сергеј Лавров, на синоќешната прес-конференција осврнувајќи се на неодамна потпишаната декларација за НАТО и ЕУ.
Декларацијата на ЕУ и НАТО за стратегиско партнерство, ја нарекува руската инвазија на Украина „најголемата закана за евроатлантската безбедност во последните децении“. Декларацијата повикува на „соработка меѓу ЕУ и НАТО со цел да се спротивстави на растечките безбедносни закани“ и охрабрува максимално вклучување на членките на НАТО кои не се членки на ЕУ, како и на членките на ЕУ кои не се членки на НАТО.
Но, во декларацијата не се наведува дека НАТО ќе ја обезбеди безбедноста на Европската Унија. И додека НАТО истакнува дека не претставува никаква закана за Русија, рускиот претседател Владимир Путин постојано се жали на проширувањето на НАТО, кое делумно го искористи за да се обиде да ја оправда руската инвазија на Украина.
Вчера Лавров на прес-конференција рече дека на Русија постојано ѝ било ветувано дека НАТО нема да се шири и додаде дека тоа се лаги.
Да потсетиме, Финска се приклучи на НАТО минатиот месец поттикната од руската инвазија на Украина.
Кремљ реагираше на влезот на Финска во НАТО со образложение дека таа ќе биде принудена да преземе контрамерки за да ја обезбеди безбедноста на сопствените граници.