Забрана за влез и излез со јавен превоз, редуцирање или затворање на фабриките и продавниците, дополнителни медицински тимови и поголем број тестирања, ќе се применуваат од денеска во Куманово како дел од зајакнатите мерки што ги донесе Владата за запирање на заканата од коронавирусот откако во овој регион беше регистриран еден смртен случај и осум случаи (до вчера) на заболени од ковид-19.
Укинат е градскиот и меѓуградскиот патнички и железничкиот јавен превоз. Владата им препорача на компаниите со големи производствени и продажни капацитети во оваа општина да го приспособат своето работење со редуциран број вработени или целосно да ги затворат.
Министерот за здравство Венко Филипче вчера изјави дека со овие мерки треба да се прекинат градските и меѓуградски врски на Куманово со другите општини со цел да се воспостави форма на карантин, нешто слично како што беше направено во Дебар кога беа утврдени случаи на локална трансмисија на болеста.
Министерството за здравство и Институтот за јавно здравје, пак, се задолжени да преземат поинтензивни активности не само во Куманово туку и во целиот Кумановски Регион. Треба да подготват посебен план со екипи за да се преземат сите потребни мерки за спроведување поголем број тестирања, со цел континуирана детекција и организација на следење на состојбата со бројот на инфицирани лица од коронавирусот, како и да се упати стручен медицински персонал и да се обезбеди техничка помош за потребите на Општата болница во Куманово.
*Поврзани вести
Куманово бара Владата да прогласи карантин на целата општина
(ГАЛЕРИЈА) Во Куманово освен аптеки и маркети, работат и други објекти