Од Скопското обвинителството најавија дека ќе се жалат за одлуката на Судот да му определи мерка куќен притвор на петтиот од осумтемина осомничени за упадот во М-НАВ, за кого ОЈО Скопје предложи да биде определен затворски притвор
За петтиот од осумтемина осомничени за упадот во Македонската навигација, кој до вчера беше во бегство, Кривичниот суд Скопје определи мерка куќен притвор, исто како и за останатите четворица осомничени.
Основното јавно обвинителство (ОЈО) Скопје, пак, по вчерашното приведување на осомничениот, кој осум дена беше недостапен за органите на прогонот, предложи да му биде определен затворски притвор.
Од Обвинителството сега најавија дека ќе се жалат по однос на ваквата одлука на Судот.
„За лицето осомничено за кривично дело – ‘загрозување на безбедноста на воздушниот сообраќај’ кое повеќе дена беше недостапно на органите на прогонот, а вчера беше лишено од слобода на граничен премин, Основниот кривичен суд Скопје определи мерка куќен притвор. Основното јавно обвинителство Скопје ќе вложи жалба на ваквата одлука“,
информираат од ОЈО Скопје.
Вчера беше приведен петтиот од вкупно осумтемина осомничени за минатонеделниот насилен упад во М-НАВ. Тој, заедно со уште тројца кои сè уште се во бегство, до вчера беше недостапен за органите на прогонот.
За настанот кој предизвика бура во јавноста, Обвинителството отвори истрага против осум лица, кои се товарат за кривичното дело загрозување на безбедноста на воздушниот сообраќај. Четири лица кратко по инцидентот се најдоа во полициска станица, а од завчера се наоѓаат и во куќен притвор, додека останатите четворица беа во бегство и полицијата трагаше по нив по распишана интерна потерница.
Меѓу четворицата за кои Судот завчера им определи мерка домашен притвор е и Беким Незири, ексминистер, актуелен претседател на огранокот на ДУИ во Чаир и вработен во М-НАВ.