Актуелниот претседател на КСС, Благоја Ралповски, на денешната прес-конференција истакна дека е задоволен од сработеното за време на неговиот мандат, но дека и натаму останува борбата за усогласување на платите со минималната плата, чиј рок за усогласување, според него, е одамна поминат
Конфедерацијата на слободни синдикати (КСС) утре на конгрес ќе избира ново раководство, по што ќе биде донесена одлука за чекорите што ќе ги преземе во наредниот период.
И покрај новото раководство кое треба да се избере утре, Синдикатот останува на истиот став дека Законот за административни службеници е потценувачки и оти со него ќе нема зголемување на платите, а и понатаму бара усогласување на останатите плати со порастот на минималецот.
Актуелниот претседател на КСС, Благоја Ралповски, на денешната прес-конференција истакна дека е задоволен од сработеното за време на неговиот мандат, но дека и натаму останува борбата за усогласување на платите со минималната плата, чиј рок за усогласување, според него, е одамна поминат.
„Имаме покачување од 12 000, 12 500, 14 000, 14 500 па 15 200 денари. Рокот е одамна поминат. Ние цело време бараме усогласување. Имаме 20 отсто во образование, пет отсто во јавен сектор, 30 проценти во здравство, а 75 проценти покачена минимална плата. Кога минималната плата се донесе во 2012 година, како се усогласуваше, така се покачуваат и платите во јавниот сектор. Во 2013 имаше покачување во јавниот сектор за пет проценти во 2015 година за пет проценти со цел да се усогласат платите, сега тоа не го гледаме. Сега не бараме да се усогласат само платите со ова покачување, туку и со она од 15 200 денари“,
рече Ралповски.
Тој смета оти во општиот колективен договор никако не може да се уредат платите во јавниот сектор.
„И Законот за плати е комплицирана процедура затоа што тука имате илјадници професии во јавниот сектор и ќе трае најмалку една до две години. Тоа е огромен процес кој е прашање дали ќе се донесе и во септември 2023 ако работиме секој ден. Само се замајува јавноста“,
смета Ралповски.
Линеарното зголемување за 2 806 денари во јавниот сектор што е предлог на Сојузот на синдикати на Македонија (ССМ), според КСС, е невозможно да се исплати затоа што плата се зема или по бод или по процент, а како што додаде првиот човек на Конфедерацијата, за тоа да се направи, потребна е измена на повеќе законски акти и правење нови решенија за работа.