Двајца жители на кичевското село Лисичани, на возраст од 36 и 39 години, ќе добијат кривични пријави затоа што ја прекршиле наредбата да седат во изолација, соопшти МВР.
Тие на 13 март авионски пристигнале во земјава од Швајцарија и потпишале изјава дека во наредните 14 дена ќе седат во задолжителна изолација во нивните домови во Лисичани, но при проверка на 19 март полицијата не ги затекнала дома.
Ова е уште еден од низата случаи со кривични пријави за прекршување на мерките за заштита од коронавирусот.
Синоќа обвинителството излезе со статистика за регистрираните случаи во изминатите четири дена (од 17-20 март) која покажува дека обвинителите од повеќе обвинителства во земјава побарале вкупно 37 казни за непочитување на мерките.
Вкупната сума на казните кои ги побарале обвинителите во овие случаи изнесува најмалку 81 000 евра.
*Поврзана вест: Бегалци од изолација досега казнети со вкупно 27 000 евра
Досега, судовите се произнеле во 12 од овие случаи и во сите го прифатиле предлогот и одредиле парични казни чија вкупна вредност е 27 000 евра. Во 10 од овие 12 случаи, изречената глоба изнесува 2 000 евра, во еден случај е 2 500 евра, а во еден 4 500 евра.