Обвинителствата во земјава во период од четири дена (17-20 март) побарале судовите да изречат вкупно 37 казни поврзани со прекршување на мерките за заштита од коронавирусот. Од нив 33 се за прекршување на наредбата за изолација, а 4 се за газди на ресторани и барови кои не ги затвориле локалите и примале гости.
Вкупната сума на казните кои ги побарале обвинителите во овие случаи изнесува најмалку 81 000 евра.
Досега, судовите се произнеле во 12 од овие случаи и во сите го прифатиле предлогот и одредиле парични казни чија вкупна вредност е 27 000 евра. Во 10 од овие 12 случаи, изречената глоба изнесува 2 000 евра, во еден случај е 2 500 евра, а во еден 4 500 евра.
Највисоката казна од 4 500 евра е за докторот од Кавадарци кој одел на работа во кавадаречката болница иако требало да седи дома во изолација, затоа што такво упатство добило целото семејство откако неговата ќерка се вратила од патување во Италија.
Во еден предмет, дури постои и можност за затворска казна до една година бидејќи обвинителството поднесе обвинителен предлог. Станува збор за случајот со мајката и ќерката од Струмица кои излегувале од станот каде требало да седат во изолација. Полицајци ги пресретнале пред зградата и ги предупредиле да се вратат назад, но мајката и ќерката почнале да се расправаат со нив и не ги почитувале препораките.
Според извештајот на обвинителството за досега регистрираните случаи, најмногу прекршувања на мерките за заштита од коронавирусот има во Кавадарци – 9, потоа во Прилеп – 7 и во Скопје – 5.
Но, по еден или два случаи забележале и обвинителствата во повеќе градови, како: Охрид, Кичево, Гостивар, Битола, Струга, Ресен, Кочани, Куманово и Гевгелија.
Токму поради прекршувањето на мерки, Владата на синоќешната седница се одлучи да воведе и поригорозни мерки. Така, отсега оние кои нема да ја почитуваат наредбата за самоизолација ќе бидат ставени во државен карантин, а трошокот ќе падне на нивен грб.