ВМРО-ДПМНЕ со денови го обвинуваат премиерот Димитар Ковачевски дека во 2001 година избегнал да служи војска, нарекувајќи го премиер – дезертер. Тој неделава објави дека ВМРО-ДПМНЕ се служи со лаги и клевети, но посочи и дека опозицијата злоупотребува здравствен предизвик и хируршка интервенција пред 20 години
ВМРО-ДПМНЕ прашуваат зошто после осум дена од нивната објава дека премиерот Димитар Ковачевски дезертирал во конфликтната 2001 година, не е покрената никаква постапка за утврдување на неговата деловна способност. Опозицијата претходно, повикувајќи се на документ од АРМ, обвини дека Ковачевски пред регрутната комисија поднесол документ дека е трајно неспособен, со што ги избегнал законските обврски кон државата.
„Нејасно е како на Ковачевски сè уште не му е покрената постапка за утврдување на деловната способност од страна на Судот во вонпарнична постапка според членовите 34, 35, 36 и 37, како и поведување на постапка за издавање, односно одземање на безбедносниот сертификат за пристап до државни тајни којшто според член 38 од ЗКИ и член 4 точка 11 и 13 од Уредбата за безбедност на лица корисници на класифицирани информации, не може да се издаде на лица кои НЕМААТ деловна способност и имаат здравствени проблеми“,
рече на денешната прес-конференција Драган Ковачки, пратеник и член на ИК на ВМРО-ДПМНЕ.
ВМРО-ДПМНЕ со денови го обвинуваат Ковачевски дека избегнал да служи војска, нарекувајќи го „премиер-дезертер“. Тој неделава на фејсбук објави дека ВМРО-ДПМНЕ се служи со лаги и клевети, но посочи и дека опозицијата злоупотребува здравствен предизвик и хируршка интервенција пред 20 години.
„Никогаш ниту сум избегнувал ниту сум бегал од одговорноста за служење на воениот рок. Само нечесни и уплашени луѓе злоупотребуваат нечиј здравствен предизвик и последователна хируршка интервенција од пред 20 години за да го прикријат својот срам и криминал. Но, не сум изненаден. Не сум изненаден и за сите други лаги, клевети, лажни вести и манипулации од ВМРО-ДПМНЕ. Тие не се менуваат, а скандалите во Град Скопје само потврдуваат дека не само што партијата не е реформирана, туку дополнително криминализирана. Граѓаните тоа го гледаат и самите ќе судат“,
наведе Ковачевски.