Премиерот зборуваше и за дијалогот со Бугарија, за што кажа дека при последно видување со бугарскиот колега Кирил Петков во грчкиот град Александруполи пред два дена тие имале само протоколарна средба во рамки на отпочнување на работите на терминалот за складирање течен природен гас
Премиерот Димитар Ковачевски порача дека неговата влада има поголем легитимитет од претходната на Зоран Заев бидејќи има поголема поддршка во парламентот, како и дека во првите 100 дена одлично се справила со предизвиците од светската економска криза.
Ковачевски ваквите пораки ги испрати во период кога ВМРО-ДПМНЕ одлучи од 10 мај да го блокира Собранието сè додека не седнат на маса со премиерот и не се договорат за предвремени избори.
„Имаме влада која е европски ориентирана и има одлични односи со сите стратешки партнери. Во текот на наредниот месец отвораме и стратешки дијалог со САД, состаноците веќе се договараат и ќе се одвиваат во Вашингтон и имаме влада која одлично во првите 100 дена се справи со сите предизвици на светската економска криза која е предизвикана прво од енергетската криза и дополнително од војната во Украина“,
изјави денеска Ковачевски.
Според него, неговиот тим има целосен политички и легален легитимитет, како и усогласена и транспарентна програма по која работи.
„Легитимитетот на Владата се црпи од пратениците во Собранието и ако го погледнеме легитимитетот на оваа влада, таа има и поголем легитимитет во однос на претходната со оглед на тоа дека 64 пратеници ја поддржуваат, дополнително уште една политика партија Алтернатива. Имаме влада со целосен политички и легален легитимитет и влада која има партнери кои имаат целосно усогласена, транспарентно направена и споделена со јавноста владина програма која ги вклучува клучните програмски определби на сите владини партнери – постојните кои беа и новиот владин партнер“,
порача Ковачевски.
Премиерот зборуваше и за дијалогот со Бугарија за што кажа дека при последно видување со бугарскиот колега Кирил Петков во грчкиот град Александруполи пред два дена тие имале само протоколарна средба во рамки на отпочнување на работите на терминалот за складирање на течен природен гас. Таму биле и амбасадорите на САД во Грција, Северна Македонија и Бугарија, меѓутоа, како што рече, исклучиво се разговарало за енергетската трансформација и независноста на регионот.