Денес Република Северна Македонија одржа меѓувладина конференција, јас говорев на македонски јазик, денес потпретседателот на ЕК зборуваше дека нашиот идентитет ќе стане посилен во ЕУ, денес држам прес-конференција на македонски јазик, порача премиерот оценувајќи дека сите манипулации од опозицијата паднале во вода
Одговорност и на опозицијата е да учествува во дебата и понатаму, политичарот не смее да мисли само на својот рејтинг туку и на иднината, се дел од пораките што ги испрати премиерот Димитар Ковачевски на прес-конференција во Брисел по одржувањето на првата меѓувладина конференција со ЕУ.
Премиерот зборуваше за опозицијата одговарајќи на новинарско прашање како ќе обезбеди национален консензус кога се во прашање уставните измени за вметнување на Бугарите во Уставот со оглед дека опозицијата не само што се противи туку најавува и референдум за протоколот потпишан со Бугарија.
„Одговорност е на опозицијата е да учествуваат во оваа дебата и понатаму. Ќе има многу чекори понатаму до финалното зачленување. Точно е, Собранието го донесе првиот чекор и тоа е место каде ќе треба да биде донесен и вториот, третиот и четвртиот чекор до финалното зачленување. Одговорност е на секој политичар е да мисли за иднината на државата и идните генерации, не смее да мисли само на својот личен рејтинг и на својата политичка кариера. Се водевме од иднината на држава, од донесување одлука која ќе овозможи иднина и просперитет за сите граѓани на државата и верувам дека сите пратеници во Собранието ќе бидат одговорни и во служба на граѓаните“,
рече премиерот.
Според премиерот, денеска паднале во вода сите манипулации и шпекулации од опозицијата.
„Денес Република Северна Македонија одржа меѓувладина конференција, јас говорев на македонски јазик, денес потпретседателот на ЕК зборуваше дека нашиот идентитет ќе стане посилен во ЕУ, денес држам прес-конференција на македонски јазик, денес на првата меѓувладина конференција сите земји членки го поздравија нашиот прв чекор кон полноправно членство. Одговорност е на сите политичари во државата да го поддржат тој пат затоа што тоа е единствениот за Република Северна Македонија кон градење на подемократска, поуспешна, просперитетна иднина“,
порача Ковачевски.
ЕУ, рече премиерот претходно на прес-конференцијата, нè прифаќа како Македонци кои говорат македонски јазик со безусловно почитување на достоинството и рече дека е уверен оти токму граѓаните од овој преговарачки процес ќе излезат како победници.
Тој и од прес-центарот во Брисел потенцираше дека денеска е историски ден и потсети дека почнуваме преговори благодарение на сите претходни генерации, тешки моменти и одлуки кои се носеле и во времето на Киро Глигоров, Никола Кљусев, Бранко Црвенковски, Борис Трајковски и Зоран Заев.
„Денес е денот кога почнуваме да пишуваме ново поглавје, историски за нас, долгоочекуван и заслужен. Им благодарам на граѓаните за нивната истрајност и јасна визија за тоа каква држава сакаме да изградиме“,
рече премиерот.