Се виде дека граѓаните се решени да го поддржат успешниот концепт на владината коалиција, а тешко се поразени оние сили кои не сакаа да се избере градоначалник во Центар Жупа, изјави Ковачевски вечерва во Жупа
„Дојдов да ја честитам победата на градоначалникот Аријан Ибраим“, изјави премиерот Димитар Ковачевски кој веднаш по затворањето на гласачките места пристигна во Центар Жупа. Таму единствен кандидат за градоначалник беше Аријан Ибраим од ДПТМ.
„Јас заедно со граѓаните овде дојдов да ја честитам победата на градоначалникот Аријан Ибраим. Се потврди дека граѓаните знаат да изберат победнички концепт, концептот којшто го претставува владината коалиција. Тешко беа поразени оние сили кои што сакаа да не се избере градоначалник во Центар Жупа. Граѓаните уште еднаш докажаа дека знаат каде треба да се движи државата, дека знаат што е добро за државата и заедно со Аријан Ибраим оваа општина ќе продолжи да се развива. Сакам на сите граѓани уште еднаш да им го честитам изборот на градоначалникот и да им посакам многу успех и развој на општината“,
рече Ковачевски во изјава во живо за Дневникот на Сител, додавајќи дека граѓаните знаат да ја ценат политиката на Владата и знаат што е добро за државата.
Ковачевски рече дека ќе биде реализирана програмата на Ибраим, но и ќе биде изграден патот што на жителите им е потребен и најави дека очекува победа на коалицијата на СДСМ и во Маврово – Ростуша.
„Како Турска демократска партија ќе продолжиме со проектите и со политиката за добро на граѓаните. Напорно работиме и ќе настојуваме да го подобриме животот во Општината“,
рече кандидатот за градоначалник Ибраим.
На редовните локални избори на 17 октовмри минатата, но и на повторените на 17 април годинава, кога имаше еден противкандидат, Ибраим освои околу 80 отсто од гласовите, но не беше обезбеден цензус, поради што и се повторија изборите.
Го повикуваме Ковачевски да каже кого победил во Центар Жупа, кога имаше само еден кандидат, реагираат од ВМРО-ДПМНЕ по изјавата на Ковачевски.
„Изборите успеаја само затоа што сограѓаните од дијаспората се во Македонија. Истовремено Ковачевски да каже кои се тие мрачни сили, и да не ја замајува јавноста со неговите лаги и обиди за прикажување на лажен триумфализам“,
се вели во писмената реакција од ВМРО-ДПМНЕ.