Или го правеа тоа затоа што имаат лажни дипломи или го правеа тоа за некои други интереси, се надевам дека тоа не се интереси на трети страни, кажа премиерот на прес-конференција
Премиерот Димитар Ковачевски на прес-конференцијата во Брисел рече дека е изненаден од тоа што во земјава хистеријата во врска со предлозите за надминување на спорот со Бугарија ја креираат луѓе што се нарекуваат експерти и велат дека се познавачи на европската интеграција.
„Се создаде голема хистерија во Северна Македонија. Јас посебно сум многу изненаден од тоа што луѓе кои се нарекуваат експерти и тврдат дека знаат како се одвиваат процесите на европската интеграција се тие што ја креираат најголемата хистерија во земјата. Произлезе дека тие не разбираат како се изработуваат предлозите, како тие се комуницираат, како тие предлози се споделуваат меѓу земјите членки и кандидатите. Или го правеа тоа затоа што имаат лажни дипломи или го правеа тоа за некои други интереси, се надевам дека тоа не се интереси на трети страни“,
рече Ковачевски одговарајќи на новинарски прашања.
На прес-конференцијата заедно со албанскиот премиер Еди Рама и српскиот претседател Александар Вучиќ, Ковачевски соопшти дека францускиот предлог за надминување на спорот и почетокот на преговорите за Северна Македонија не е прифатлив во ваква форма како што е.
„Предлогот во ваква форма како што е во моментов е неприфатлив за мене, за претседателот на државата, за владата, за коалициските партнери и за граѓаните на Република Северна Македонија. Доколку во текот на француското претседателство се постигне разбирање на нашите позиции, ние сме подготвени да се вклучиме во разговори за истите за да се започнат преговори до крајот на јуни. Сакам да ја искористам оваа пригода и да порачам дека граѓаните може да се спокојни. Ние секогаш ги имаме во прв план стратешките интереси и цели на државата. Никој не може без наша согласност да наметне какво било решение. Ние направивме сè, сега ЕУ е на потег“,
рече претходно премиерот.
Ние, кажа Ковачевски, не бараме ништо повеќе ни помалку од тоа што го добија сите 27 земји членки на ЕУ при пристапувањето, а тоа е почитување на лингвистичкиот, етничкиот, културниот и историскиот идентитет.