На средбата било истакнато дека во ова време на кризна состојба во светот, вредноста и придобивките од членството на Република Северна Македонија во НАТО и од стратешкото партнерство со САД се од исклучително значење
Премиерот Димитар Ковачевски имаше средба во Владата со американската амбасадорка во земјава Кејт Мари Брнз, на која разговараа за ситуацијата во Украина.
На средбата било истакнато дека воената агресија на Руската Федерација на една суверена земја е сериозна закана за мирот и безбедноста во Европа и во светот која како таква ја оцени огромен дел од меѓународната заедница.
Како што соопшти владината прес-служба, на средбата било истакнато дека во ова време на кризна состојба во светот, вредноста и придобивките од членството на Република Северна Македонија во НАТО и од стратешкото партнерство со САД се од исклучително значење.
Премиерот Ковачевски во разговорот со амбасадорката Брнз ги презентирал мерките на Владата за справување со последиците од економската и енергетската криза, кои дополнително се усложнуваат со војната во Украина, и истакнал дека станува збор за сеопфатни мерки таргетирани да ја заштитат социјалната сигурност и стандардот на граѓаните, како и да обезбедат стабилни услови за работа на компаниите.
Амбасадорката Брнз нагласила дека сегашната безбедносна криза во Европа укажува на потребата од континуиран фокус на регионот и на Северна Македонија, вклучувајќи ја и Европската интеграција на земјата.