Директорот на градската болница „8 Септември“, Кристијан Костов, вели дека болницата е спремна да одговори на потребите за лекување на заразени со коронавирус, но најголем проблем е што во неа не се вршат тестирања и на резултатите од Институтот за јавно здравје некогаш се чека и до два дена, пишува СДК.
Според него, итно е потребен апарат за лабораториска анализа на вируси за да може да се забрза протокот на пациенти сомнителни на ковид-19, кои во сѐ поголем број се примаат на болничко лекување.
„Имаме услови, имаме простории, имаме специјалисти биохемичари, имаме искусни лаборанти кои знаат да работат во болнички услови и многу ќе биде корисно да ја забрзаме постапката на прием на пациенти со тоа што самите ќе можеме да откриеме дали некој што има друга мака е позитивен на коронавирус или не“,
вели Костов.
Во моментов, како што пишува СДК, во карантинскиот дел на болницата се лекуваат 22 пациенти кај кои или е регистрирана зараза со коронавирус, или се чекаат резултатите дали се позитивни. Од нив четворица се со тешка клиничка слика, од кои двајца се приклучени на машини за вештачко дишење, а седуммина се кислородно зависни. Другите 11 се стабилни, со полесна клиничка слика.
Во текот на денот Владата соопшти дека капацитетите на оваа болница се ставени во функција за потребите во справување со ширењето на коронавирусот.