Костадинов очекува опозицијата да ја преиспита својата одлука
Најавите дека ВМРО-ДПМНЕ ќе гласа против потврдувањето на одлуките за прогласување вонредна состојба уште еднаш ја потврдија деструктивноста и неодговорноста на оваа партија, порача Костадин Костадинов од СДСМ.
„Потврдувањето од страна на Собранието на одлуките за прогласување вонредна состојба е во интерес на граѓаните, на институциите, на државата. Денеска, видовме дека ВМРО-ДПМНЕ упорно стои на спротивната страна. ВМРО-ДПМНЕ предводена од Мицкоски останува посветена на деструкција, неодговорно и незрело однесување, кое е на штета на Собранието, на државата. Без разлика на сите обиди за опструкции од страна на ВМРО-ДПМНЕ, државата продолжува по патот на развојот и напредокот во интерес на сите граѓани“,
рече Костадинов.
Тој вели дека очекува опозицијата да ја преиспита својата одлука и додаде дека и да не се потврдат одлуките за вонредната состојба нема да има реперкусии.
„Сакам да верувам дека ВМРО-ДПМНЕ ќе ја преиспита својата одлука, од друга страна убеден сум дека сета она што излегува по страните дека на некој начин доколку не се потврди одлуката со дво-третинско мнозинство ќе има некакви реперкусии кон граѓаните, тоа го отфрлам со сигурност, бидејќи во таква ситуација Уставот е секако јасен. Станува збор за време и состојба во која немаше услови за свикување на Собранието, при што единствен надлежен за прогласување на вонредна состојба е претседателот на државата. Ја разбирам потребата на опозицијата да критикува и да биде коректив на власта, но кога тоа е аргументирано и кога постојат факти за тоа“,
рече Костандинов.
ВМРО-ДПМНЕ најави дека нема да гласа за потврдување на одлуките за прогласување на вонредната состојба затоа што смета дека уредбите кои беа донесени не дадоа ефекти за да се надмине економската и здравствената криза и беа со цел да се злоупотребат изборите.