Стојаноска рече дека опозицијата ќе ја разгледа можноста за импичмент на претседателот Стево Пендаровски
ВМРО-ДПМНЕ нема да гласа за потврдување на одлуките за прогласување на вонредната состојба затоа што уредбите кои беа донесени не дадоа ефекти за да се надмине економската и здравствената криза и беа со цел да се злоупотребат изборите, рече Дафина Стојаноска од ВМРО-ДПМНЕ во вечерашното гостување на ТВ24.
„ВМРО-ДПМНЕ беше меѓу првите партии кои повика на вонредна состојба, но денеска дојдовме до фактот дека после тие прогласени уредби видовме дека причината поради која истите се донесоа нели беше пандемијата која што ја зафати Македонија и секако економската криза која што ние предупредувавме од февруари месец. Но, видовме дека никакви ефекти од тие уредби не се постигнаа затоа што голем дел од тие уредби не беа наменети за економската и ковид кризата, беа наменети за други цели, да не речам злоупотреба за изборите кои следуваа, не беа наменети стриктно само за здравствена криза и затоа денеска се наоѓаме во уште подлабока здравствена криза која е и економска кој што и двете во периодот кој што следува ќе се продлабочуваат“,
рече Стојаноска.
Таа додаде дека од овие причини ВМРО-ДПМНЕ јавно излезе со ставот дека нема да гласа за овие одлуки затоа што, како што вели, не донесоа ништо позитивно.
Стојаноска рече дека опозицијата ќе ја разгледаа можноста за импичмент на претседателот Стево Пендаровски.
„Во текот на емисијата кажав дека одговорот за овој проблем кој што е несомнено дека ќе стане и голем, треба да се побараат или кај претседателот или кај Уставниот суд, но по однос на ова што ме прашавте дали ќе поднесеме иницијатива за импичмент на претседателот секако ќе ја разгледаме, став немаме донесено“,
рече Стојаноска.
Дека пратениците на ВМРО-ДПМНЕ нема да гласат за потврдување на петте одлуки на претседателот Стево Пендаровски било одлучено на денешната координација на пратеничката група на партијата, така што е извесно дека одлуките што шефот на државата ги донесе по предлог на техничката влада нема да бидат потврдени во овој собраниски состав, затоа што за тоа е потребно двотретинско мнозинство.
Пратеникот Антонијо Милошоски наброја три причини поради кои ВМРО-ДПМНЕ нема да гласа за одлуките на Пендаровски.
Затоа што тие биле донесени за справување со здравствената криза, а сега ситуацијата на тој план, според нив, е полоша, затоа што целта на овие одлуки била да се надминат економските последици од ковид-кризата, а сега економската ситуација е уште полоша, и затоа што техничката влада ја злоупотребила ситуацијата за да носи уредби со законска сила кои не биле неопходни.