„По свадба тапани“ е потврдување на одлуките за прогласување вонредна состојба по нејзиното завршување, вели поранешната министерка за правда Рената Дескоска.
Одлуките на претседателот Стево Пендаровски за прогласување на вонредна состојба денеска се најдоа на собраниска седница која беше прекината, а на која ВМРО-ДПМНЕ најави дека нема да гласа, со што нема да може да се обезбеди двотретинско мнозинство.
Поранешната министерка смета дека потврдувањето на овие одлуки во Собранието, во ситуација кога е завршена вонредната состојба, немаат логика.
„Уставот предвидува дека ако Собранието не може да се состане, одлука за постоење на вонредна состојба донесува претседателот на Републиката и му ја поднесува на Собранието на потврдување штом тоа ќе е во можност да се состане. Целта на оваа одредба е Собранието да одлучи за траењето на вонредната состојба прогласена од претседателот – дали таа треба да продолжи или да биде прекината. Одлучување на Собранието за потврдување на одлуките на претседателот за прогласување вонредна состојба имаат логика само додека трае вонредната состојба. Сега, по завршувањето на вонредната состојба, ова одлучување е беспредметно“,
вели Дескоска во нејзината Фејсбук објава.
Одлучувањето во Собранието, според неа, сега нема да има никаков правен ефект токму поради тоа што тие одлуки за вонредна состојба престанале. Исто така, нагласува Дескоска, непотврдувањето на одлуките во законодавниот дом нема да значат и некаква постапка за одговорност на претседателот Пендаровски.
„Несомнено е дека претседателот на Републиката бил обврзан да ги прати на потврда на Собранието своите одлуки, но Собранието не треба да почнува беспредметни постапки. Оние што седат во Собранието треба да се свесни дека покрај текстуалното толкување на Уставот, постојат и други методи, како целно толкување, оригинализам, прудентно и сл. Притоа, не смеат да бидат ’скарани‘ со логиката. Зашто, на крајот од краиштата, логиката треба да биде нужна компонента на секое правно толкување, вклучувајќи го и толкувањето на Уставот“,
вели Дескоска.
Министерката вели дека целата ситуација околу вонредната состојба покажала дека уставните одредби се многу скромни, често недоречени и непрецизни и тоа, според ексминистерката, ја наметнува потребата од итно носење закон за воена и вонредна состојба, кој ќе ги реши отворените прашања. Исто така, додава таа, неопходна е измена и на Законот за Владата, кој внесе дополнителна конфузија околу уредбите со законска сила.