Косово оди на предвремени избори откако Уставниот суд пред околу две недели одлучи дека актуелната влада на Хоти е нелегитимна бидејќи за неа гласал пратеник кој е правосилно осуден со затворска казна, а без чиј глас немаше да го има потребното мнозинство за избор на владата
Откако Уставниот суд ја урна косовската влада предводена од Авдулах Хоти, Косово ја почна процедурата за предвремените парламентарни избори. Денеска Централната изборна комисија (ДИК) ги утврди роковите за изборните процедури откако синоќа в.д. претседателката, собраниската спикерка, Вјоса Османи, одлучи да го распушти Собранието и да се одржат избори на 14 февруари.
Според денешните одлуки на ЦИК, кампањата ќе трае 10 дена, од 2 до 12 февруари, кога стапува на сила изборен молк.
Од утре до 16 јануари, пак, тече рокот за пријавување на учесниците на изборите.
Предвременото гласање по пошта ќе трае од 2 до 12 февруари односно до 24 часа пред изборниот ден, а граѓаните ќе може да се регистрираат за ваков начин на гласање од 13 до 24 јануари.
За овие предвремени избори ќе се издвојат 5,6 милиони евра од Буџетот, а ако останат непотрошени пари, истите ќе се вратат назад во државната каса.
Косово оди на предвремени избори откако Уставниот суд пред околу две недели одлучи дека актуелната влада на Хоти е нелегитимна. Ваквата иницијатива до судот порекна поранешниот премиер, Албин Курти од Движењето за самоопределување од причина што за владата на Хоти гласал пратеникот Етем Арифи кој претходно бил правосилно осуден за измама од 1 година и 3 месеци затвор.
Според Уставот на Косово, мандатот на пратеник се поништува ако тој е правосилно осуден на една или повеќе години затвор, со што се процени дека гласот на Арифи бил нелегитимен, а со тоа и изборот на владата на Хоти бидејќи истата беше изгласана на работ на потребното мнозинство од 61 глас.