Вчерашната размена е редок момент на соработка меѓу Русија и САД од руската инвазија на Украина во февруари, но Кремљ јасно стави до знаење дека тоа не е знак за подобрени односи
Кошаркарската ѕвезда Бритни Гринер пристигна во САД по 10-месечната затворска казна во Русија, која заврши со размена на затвореници и ослободување на трговецот со оружје Виктор Бут од американскиот затвор, кој беше пречекан од неговото семејство на аеродромот во Москва.
Гринер, пренесува Ројтерс, слетала во Сан Антонио, Тексас. Размената на затворениците се случи во четвртокот на аеродромот во Абу Даби во Обединетите Арапски Емирати.
Вчерашната размена е редок момент на соработка меѓу Русија и САД од руската инвазија на Украина во февруари, но Кремљ јасно стави до знаење дека тоа не е знак за подобрени односи.
Двете земји разменија и затвореници во април, кога Русија го ослободи поранешниот маринец Тревор Рид, а САД го ослободија рускиот пилот Константин Јарошенко.
Гринер (32), двократна олимписка освојувачка на златен медал и ѕвезда на Феникс Меркјури, беше уапсена на 17 февруари на аеродромот во Москва, откако во нејзиниот багаж беа пронајдени ампули со масло од канабис, кое е забрането во Русија.
Преговорите за нејзиното ослободување беа комплицирани со руската инвазија на Украина на 24 февруари и последователниот прекин на односите меѓу Вашингтон и Москва.
Таа на 4 август беше осудена на девет години затвор за поседување и трговија со дрога. Таа се изјасни за виновна, но рече дека направила „грешка“ и дека нема намера да го прекрши законот.
Објавувајќи го нејзиното ослободување во четвртокот, американскиот претседател Џо Бајден рече дека размената стави крај на, како што рече, месеци на „пекол“ за неа и нејзиниот сопруг.
Додека Гринер се враќала дома, Бут пристигнал во Москва и ги прегрнал мајка си и сопругата, покажаа телевизиските снимки.