Денеска судот во рускиот град Химки ја осуди на девет години затвор кошаркарската ѕвезда Бритни Грајнер поради поседување помалку од еден грам масло од канбис. Бајден ваквата одлука на судат ја нарече „неприфатлива“
Кошаркарската ѕвезда на ВНБА, Бритни Грајнер, рускиот суд ја осуди на девет години затвор и парична казна од еден милион рубли (околу 16 400 долари). Судијката Ана Сотникова при изрекувањето на пресудата во градскиот суд во Химки рече дека ги зела предвид нејзиното делумно признавање вина, каењето за делото, здравствената состојба, како и добротворните активности.
Грајнер беше прогласена за виновна за шверц на дрога, кривично дело за кое судијката рече дека го извршила намерно.
Грајнер беше уапсена со помалку од еден грам масло од канабис во нејзиниот багаж на меѓународниот аеродром „Шереметјево“ во Москва на 17 февруари.
Таа рече дека не ги прекршила руските закони намерно, затоа што по грешка ги спакувала патроните кога дошла од САД.
Нејзините адвокати тврдеа дека ако Грајнер некогаш користела медицинска марихуана, тоа било само дома во Аризона, каде што е легално, многу ретко, во кратки периоди помеѓу натпреварите и на одмор, само со рецепт од лекар за нејзините силни болки од спортски повреди.
Двократната олимписка златна медалистка се извини во својата ненамерна грешка и побара од судот попустливост објаснувајќи дека немала намера да прекрши какви било руски закони.
Руското обвинителство бараше девет и пол години затвор затоа што намерно се обидела да прошверцува нелегална супстанција во Русија.
Одбраната на Грајнер ќе поднесе жалба
Адвокатите на Грајнер, Марија Благоволина и Александар Бојков, во писмена изјава по објавувањето на пресудата соопштија дека судот ги игнорирал сите докази што ги приложиле и дека ќе се жалат на одлуката.
„Многу сме разочарани од пресудата. Како правни професионалци, сметаме дека судот треба да биде праведен кон сите, без разлика на националноста. Судот целосно ги игнорираше сите докази на одбраната и што е најважно признавањето вина. Ова е во спротивност со постојната правна практика. Имајќи ја предвид количината на материјата (да не зборуваме за недостатоците на вештачењето) и изјаснувањето, пресудата е апсолутно неразумна. Сигурно ќе поднесеме жалба,“
велат адвокатите на Грајнер
САД нудат размена на затвореници за Грајнер
Соединетите Американски Држави ѝ дадоа, како што администрацијата ја нарече, „суштинска понуда“ на Русија да ги разменат Гринер и Пол Вилан за осудениот руски трговец со оружје Виктор Бут. Администрацијата ќе продолжи да се обидува да продолжи со тие преговори и да ја притисне Русија да ја прифати таа понуда, изјавија официјални лица.
Реакција на Бајден по изрекувањето на пресудата
Се огласи и американскиот претседател Џо Бајден по изрекувањето на пресудата од страна на рускиот суд. Тој казната од девет години затвор ја нарече „неприфатлива“.
„Денес, американската државјанка Бритни Грајнер доби затворска казна што е уште еден потсетник на она што светот веќе го знаеше: Русија неправедно ја притвори Бритни. Тоа е неприфатливо и ја повикувам Русија веднаш да ја ослободи за да може да биде со партнерот, најблиските, пријателите и соиграчите“,
рече Бајден во изјавата.
Тој додаде дека неговата администрација ќе продолжи да работи неуморно и ќе ги следи сите можни патишта за да ги врати Грајнер и Пол Вилан безбедно дома што е можно поскоро.