Премиерот Димитар Ковачевски на фејсбук објави дека вечерва телефонски разговарал со градоначалникот на општина Битола, Тони Коњановски, за да се информира за пожарот кој речиси четири часа беснееше во фабриката „Жито Битола“ и кој иако е локализиран, сè уште не е целосно изгаснат.
„Министерот Спасовски и директорот на ЦУК, Стојанче Ангелов се во постојана комуникација со општината, а екипите на МВР навремено пружија поддршка за локалицирање на пожарот. Благовремената и координирана реакција го спречи ширењето на пожарот и предизвикувањето на поголема штета“,
напиша Ковачевски.
Претходно, градоначалникот Коњановски побара помош во гасењето на огнот од околните градови и од централната власт.
Пожарот кој попладнево во 17.20 избувна во „Жито Битола“, по речиси четири часа беше ставен под контрола, но, догаснувањето веројатно ќе трае цела ноќ.
Со објектот сега стопанисува фирмата „Ангро механизација – Жито Битола“, во чиј состав има пекара, млин и силос.
Првичните информации се дека пожарот настанал на кровот, кој целосно е изгорен.
Опожарената зграда се наоѓа во индустрискиот дел на Битола, каде по неколкучасовен прекин, овој дел од градот вечерва повторно доби струја.