Двајца работници успеале да го напуштат објектот на „Жито Битола“, каде попладнево избувна голем пожар, изјави вечерва градоначалникот на Битола, Тони Коњановски. Со објектот сега стопанисува фирмата „Ангро механизација – Жито Битола“, во чиј состав има пекара, млин и силос.
Пожарот сè уште е активен. Го гасат 27 пожарникари со девет возила.
Градоначалникот побарал РЕК Битола да отстапи цистерна, а се бара помош и од други места.
„Контактирано е и со околните градови и со Кавадарци. Контактирано е и со директорот на Центарот за управување со кризи, Стојанче Ангелов и со министерот за внатрешни работи, Оливер Спасовски. Тоа е стар објект каде пожарникарите се обидуваат да го локализираат пожарот. Колку што сме информирани во објектот имало двајца присутни кои го напуштиле објектот, така што, во моментов, немаме информации за не дај Боже, евентуални жртви“,
кажа Коњановски.
Претходно и полицијата соопшти дека досега нема пријава за повредени лица во пожарот.
Првичните информации се дека пожарот настанал на кровот на објектот.
Фабриката за леб се наоѓа во индустрискиот дел на Битола.