Според „Гласен текстилец“, по пријавата во Трудовиот инспекторат, на работодавачот во „Крзно“ и Крзно Делчево“ му е издаден налог, во рок од 10 дена, да направи корекција на платите
Вработени во приватна конфекција во Делчево, кои користеле мерки во време на пандемијата, добиле паричен надомест под минималната плата за периодот додека траеле мерките.
Во објава на својот Фејсбук профил од ,,Гласен текстилец” соопштија дека на удар на работодавците биле бремени, хронично болни и родители на деца до 10-годишна возраст.
„По добиени сознанија за конфекциите ‘Крзно’ и ‘Крзно Делчево’ за исплата под минимална плата за вработени кои користеле мерки во време на пандемијата ‘Гласен текстилец’ поднесе барања за инспекциски надзор до надлежниот Трудов инспекторат за корекција на плата. По извршениот инспекциски надзор, инспекторка од областа на трудот го задолжи работодавачот на двете фирми да направи корекција на плата за вкупно 21 лице кои ги користеле мерките од Владата“,
се вели во објавата.
Против работодавачот, како што се наведува, издадено е решение и дадена наредба да се направи корекција на плата со рок од 10 дена.
„Ова е доказ за уште една успешна соработка меѓу Државниот трудов инспекторат и ‘Гласен текстилец’ во насока на заштита на работничките права во време на оваа криза поради ковид -19“,
се вели во објавата на Здружението.
Оттаму додаваат дека во овој период, вработените од приватниот сектор биле први на удар, при што меѓу најранливите категории вработени се бремени жени, хронично болни и мајките на деца до 10 години. Од Здружението посочуваат дека внимателно ќе продолжат да ги следат состојбите, при што со правна помош и поддршка ќе се обидат да им помогнат на сите кои бараат нивна помош.