Членот на Државната изборна комисија, Борис Кондарко вели дека ДИК не организира политички јавни дебати, не дели пари на кандидатите и на партиите, туку тоа е регулирано во Изборниот закон
Кандидатите и политичките партии мора да го познаваат Изборниот закон и надлежностите на Државната изборна комисија (ДИК) ако сакаат да учествуваат во изборниот процес, а не неосновано да изнесуваат непроверени и паушални напади, рече членот на ДИК, Борис Кондарко.
Изјавата на Кондарко, која е во името на ДИК, доаѓа по повод изнесените реакции од дел од претседателските кандидати за време на потпишувањето на Кодексот за фер и демократски избори.
Кондарко, денеска, на почетокот на попладневната 92. седница на ДИК, во процедурално обраќање посочи дека ДИК не организира политички јавни дебати, не ги определува правилата на игра и нема да дозволи никакви влијанија и мешање ниту на партиите ниту на кандидатите.
„ДИК не е ниту политичка партија ниту политички противник на кој било од кандидатите и со оваа реакција нема намера да им прави никаква промоција, но едноставно мора да реагира и не може да премолчи, затоа што од дел од кандидатите беа изнесени директни напади, притисоци и невистини за работата и одлучувањето на ДИК“,
рече Кондарко.
Тој рече дека ДИК не организира политички јавни дебати, не дели пари на кандидатите и на партиите, туку тоа е регулирано во Изборниот закон. Кондарко додаде дека ДИК не носи изборен закон и не ги определува правилата на игра, туку тоа го прави Парламентот.
„ДИК не е Парламент, и ако имаат некои забелешки, кандидатите да ги решаваат проблемите во Парламентот со политичките партии кои го гласаат Изборниот закон“,
рече тој.
ДИК, како што додаде, единствено го спроведува Изборниот закон и се грижи за организација на изборниот процес согласно своите законски надлежности.
„ДИК со оваа реакција само сака да покаже дека нема да дозволи никакви влијанија и мешање ниту на партиите ниту на кандидатите во работата и надлежностите на ДИК. Преку ова го штитиме својот професионален углед и институционален интегритет, но и интегритетот, угледот и сликата за изборниот процес во државата. Со оваа реакција не навлегуваме во останатите пораки на кандидатите, тоа е сепак нивна одговорност пред граѓаните и нив треба да ги гласаат. ДИК не настапува на избори, ДИК се грижи за законито спроведување на изборите и единствено така работи“,
рече Кондарко.
Реакцијата на Кондарко доаѓа откако кандидатите за претседател на државата денеска во Државната изборна комисија го потпишаа Кодексот за фер и демократски избори, освен претседателскиот кандидат на ГРОМ и коалицијата „Храбро за Македонија“, Стевчо Јакимовски, кој рече дека ќе го почитува Кодексот, но нема да го потпише доколку ДИК не гарантира дека ќе организира дебати, посочувајќи дека одредени кандидати се максимално фаворизирани и средствата за кампањата не се рамноправно поделени.
Останатите кандидати ставија потпис и се обврзаа дека кампањата ќе ја водат согласно Кодексот, иако дел од нив изразија скепса и реагираа што мастер дебатите што требаше да се одржат се откажани.