Александар Даштевски, претседателот на ДИК, рече дека учесниците во изборниот процес недвосмислено се обврзуваат дека нема да користат говор на омраза и нема да вршат никаква дискриминација или омаловажувања врз основа на пол
Шесте кандидати за претседател на државата денеска во Државната изборна комисија (ДИК) го потпишаа Кодексот за фер и демократски избори, со кој се обврзуваат дека ќе ги почитуваат изборните закони и владеењето на правото.
Александар Даштевски, претседателот на ДИК, рече дека учесниците во изборниот процес недвосмислено се обврзуваат дека нема да користат говор на омраза и нема да вршат никаква дискриминација или омаловажувања врз основа на пол.
Содржината на Кодексот ја прочита потпретседателката на ДИК, Дитмире Шеху, која нагласи дека ќе се залагаат сите учесници да ги почитуваат сите закони, нема да користат говор на омраза и за спроведување успешно фер и демократски на изборите.
Кодексот единствено не го потпиша Стевчо Јакимовски, кандидатот за претседател од партијата ГРОМ.
Сите учесници добија неколку минути да изразат свое мислење околу потпишувањето на кодексот.
Актуелниот шеф на државата Стево Пендаровски и кандидат за претседател поддржан од СДСМ изрази уверување дека имаме доволно институционална меморија како држава и доволно политичка култура меѓу сите кандидатите да го одржат нивото на дебата и целиот процес да биде фер и демократски.
„Уверен сум дека како и пред пет години нема да биде оспорен изборниот резултат во суштинска смисла, можни се одредени процедурални забелешки и приговори, меѓутоа во целина мислам дека ќе докажеме дека како држава сме подготвени“,
рече Пендаровски.
Гордана Силјановска-Давкова, кадидатката за претседател на државата поддржана од ВМРО-ДПМНЕ, рече дека потпишувањето на кодексот е церемонијален чин и нормативен и морален илузионизам, но посочи дека лично таа ќе говори со аргументи и програма и ќе ги почитува сите кандидати.
„Ниту минатиот пат ниту сега нема да посегам по ад-хоминем однос, ќе говорам со аргументи за програмата и ќе ги почитувам сите кандидати“,
рече Силјановска-Давкова.
Стевчо Јакимовски, кандидат од ГРОМ, пак, рече дека Кодексот ќе го почитува, но нема да го потпише доколку ДИК не гарантираат дека ќе организира дебати, посочувајќи дека одредени кандидати се максимално фаворизирани и средствата за кампања не биле рамноправно поделени.
„Утрово ја добив веста дека се откажува мастер дебатата. Тоа не е во ред. Не оди во ред на развој на демократските избори. Ако немаме дебати, јас кодексот нема да го потпишам. ДИК е должен да ги направи сите услови за реализација за изборите“,
рече Јакимовски.
Даштевски повтори дека Кодексот за фер и демократски избори подразбира неколку приоритети, кои мора да се почитуваат, како владеење на правото, слободни фер и демократски избори, забрана за говор на омраза, забрана за било каква дискриминација и родовите права.
Бујар Османи, кандидат за претседател со поддршка од ДУИ, рече дека ќе се залага за позитивна кампања порачувајќи дека повеќе станува политички морал и даден збор пред граѓаните дека ќе пристапат коректно кон, како што рече, овие важни избори за нашата држава.
„Никогаш досега не сум користел некоректен пристап кон некој во политичката трка. Никогаш не сум користел црна кампања или несоодветен јазик кон било кој противник“,
рече Османи.
Кандидатката за претседател Билјана Ванковска, поддржана од Левица нагласи дека Кодексот ќе го потпише, но не верува во ништо од ова, како што рече, празно парче хартија и побара телевизиите да организираат дебати со сите претседателски кандидати.
„Кампањата е почната и веќе е фаворизирана. Вчера заедно со лидерот на Левица поднесовме претставка до Уставниот суд, а ангажиравме и адвокат против членовите на ДИК и членовите на АВМРУ за нерамномерна распределба на она малку време што ни е на располагање“,
рече таа.
Кандидатот за претседател на државата Арбен Таравари од коалицијата на опозициските партии на Албанците „Вреди“ изрази надеж дека овие избори ќе бидат најфер и најдемократски избори досега.
„Јас посакувам и се надевам дека овие избори ќе бидат пофер и подемократски, барем од претходните избори што ги имавме во 2021 година. Тоа не зависи толку од нас кои сме кандидати на опозицијата, туку од партиите кои се на власт“,
рече Таравари.
Максим Димитриевски од Движењето ЗНАМ – За наша Македонија рече дека ќе ги прифати сите јавни настапи со сите претседателски кандидати и посака на овие двојни избори да победи демократијата.
„Оваа форма којашто ја потпишуваме, уште однапред, без разлика што преземам целосна одговорност со моето потпишување да ја почитувам, нема да биде почитувана во целост“,
рече Димитриевски.
Кампањата за претседателските избори почнува на 4 април, а изборната кампања за парламентарните избори ќе започне на 18 април. Неколку дена ќе се поклопи со кампањата за избор на претседател, која завршува на 22 април, а гласањето е на 24 април (прв круг).