Комитетот на министри на Советот на Европа конкретно ги повика бугарската Агенција за регистрација и надлежните судови да постапуваат согласно членот 11 од Европската конвенција за човекови права, кој што предвидува слобода на здружување без ограничувања
Властите во Бугарија да ги почитуваат пресудите на Европскиот суд за човекови права (ЕСЧП) и да дозволат регистрација на здруженијата кои имаат за цел признавање на македонското малцинство во Бугарија, повика Комитетот на министри на Советот на Европа, кој од 6 до 8 декември ги разгледуваше неспроведените одлуки на судот во Стразбур.
Меѓу неспроведените одлуки за кои се произнесе и донесен одлука Комитетот на министри на СЕ се и оние за македонските здруженија кои уште пред 16 години го добија првиот случај на ЕСЧП против Бугарија. Оттогаш во Стразбур има повеќе пресуди во корист на македонските здруженија во Бугарија.
„Силно сме против фактот што и покрај усвојувањето на времената резолуција во 2020 година и последователните одлуки, повеќе од 16 години по првата финална пресуда од оваа група, на здруженијата кои имаат за цел да остварат признавање на македонското малцинство продолжува рутински да им се одбива регистрација главно поради поширок проблем на неодобрување на нивните цели и се соочуваат со постојана пракса од страна на властите кои наоѓаат нови основи за одбивање иако документите за регистрација се неколку пати разгледувани“,
стои во точка 2 на одлуката на Комитетот на министри.
Станува зброт за случаите: ОМО Илинден и други против Бугарија од 2006 година, ОМО Илинден и други против Бугарија од 2011 година, ОМО Илинден и други против Бугарија од 2018 година, Јордан Иванов и други против Бугарија од 2018 година, Македонски клуб за етничка толеранција во Бугарија и Радонов против Бугарија од 2020 година и Василев и Друштво на репресираните Македонци во Бугарија жртви на комунистичкиот терор против Бугарија од 2020 година.
Комитетот на министрите во својата одлука потсетува дека оваа група случаи се однесува на неоправдано одбивање од страна на судовите, помеѓу 1999 и 2015 година, да регистрираат здруженија со цел да се добие признавање на „македонското малцинство во Бугарија“, врз основа на опасност за националната безбедност, заштитата на јавниот ред и правата на други (цели насочени кон „признавање на македонското малцинство“ и наводни сепаратистички идеи) и за уставна забрана на здруженија кои остваруваат политички цели, како и неуспехот да се усогласат со законските формални барања, кои според Европскиот суд за човекови права претставуваат повреда на член 11 од Европската конвенција за човекови права.
Комитетот на министри на Советот на Европа конкретно ги повика бугарската Агенција за регистрација и надлежните судови да постапуваат согласно членот 11 од Европската конвенција за човекови права, кој што предвидува слобода на здружување без ограничувања.
Доколку македонските здруженија имаат грешки во формуларите, надлежните бугарски институции треба да им помогнат, а не да ги отфрлат апликациите за формирање на здруженија.
„Ги повикуваме властите да ги преземат сите потребни мерки за да се усогласат со времената резолуција од 2020 година и последователните одлуки, посебно да осигураат дека секое ново барање за регистрација од страна на здруженијата ќе биде разгледано во согласност со членот 11 од Европската конвенција за човекови права и со обврска да им се дадат инструкции за исправка на документите за регистрација. Агенцијата за регистрација и надлежните судови да не одбиваат регистрација на здруженија кои што имаат за цел признавање на македонското малцинство во Бугарија“,
се вели во одлуката.
Комитетот на министри ќе изврши контрола на спроведеното од овие препораки и во септември 2023 година.
Комитетот на министри го сочинуваат министрите за надворешни работи на земјите членки на Советот на Европа и го надгледува спроведувањето на пресудите на Европскиот суд за човекови права.