Од СВР Охрид порачаа дека полицајците постапувале поради непочитување на мерките односно забраната за групирање на повеќе од четири лица. Велат дека од претходно биле договорени со организаторите да нема групирања, но тоа не се испочитувало
По полициската интервенција на карневалот во Вевчани поради непочитување на протоколите за заштита од ковид-19, двете најголеми политички партии, СДСМ и ВМРО-ДПМНЕ, излегоа со меѓусебни обвинувањата во врска со случувањата.
Опозицијата ја обвини власта дека е маќеа на народот, додека од друга страна беше „мајка на своите“ за прославата по локалните избори во Штип, а од владејачкиот СДСМ, пак, возвратија дека ВМРО-ДПМНЕ го носи народот во опасност, провоцира и предизвикува тензии.
„Кога Владата за своите во Штип е ’мајка‘, а за народот во Вевчани ’маќеа‘. Кога Владата цензурира критика и традиција долга илјадници години, а не спречува роденден на пример во самата Влада. Кога самата власт организира избори во Штип и Пласница, а на народот му забранува да организира карневал зошто тој е критика за Владата. Кога полицијата наместо криминалци, се тера да го брка својот народ. Народе, добро запамети го овој ден и овие двојни аршини. Прво пораз, а потоа одговорност за сите од власта“,
реагираше лидерот на ВМРО-ДПМНЕ, Христијан Мицкоски.
Во интервенцијата и судирот помеѓу полицијата дел од собраните лица на карневалот, имало и приведени, а еден од нив бил и претседателот на Општинскиот комитет на ВМРО-ДПМНЕ во Вевчани, Ѓорѓи Влајнкиноски. Тој објави фотографија и видеа на Фејсбук, меѓу кои и „селфи“ од полициското комбе.
„Денес бев апсен. За ништо, се разбира. Нема страв, нема предавање. Има полициска бруталност, ама ќе им помине. Вевчанци, драги мои Вевчанци посебно Ви благодарам за пркосот кон полициската бруталност“,
напиша Влајнкиноски.
Во реакцијата од СДСМ, пак, ја обвинија група предводена токму од Влајнкиноски, намерно провоцирала и предизвикала инцидент.
„Група активисти, предводени од претседателот на ОК на ВМРО-ДПМНЕ во Вевчани започнале провокации кон припадниците на МВР, кои интервенирале при прекршувањата на мерките за заштита на здравјето. ВМРО-ДПМНЕ во Вевчани намерно предизвика инцидент а преку порталите под контрола на белиот дворец се обидува да ја подгрева јавноста преку тенденциозни и несоодветни споредби со настаните од 1987 година. Уште еднаш на дело се покажа неодговорноста на ВМРО-ДПМНЕ и очајната состојба во која се наоѓаат. Свесно ги носеа жителите на Вевчани во опасност, провоцирајќи и поттикнувајќи поделби меѓу граѓаните. Не проаѓа тоа“,
порачаа од СДСМ.
По интервенцијата на полицијата, од СВР Охрид порачаа дека полицајците постапувале поради непочитување на мерките односно забраната за групирање на повеќе од четири лица. Велат дека од претходно биле договорени со организаторите да нема групирања, но тоа не се испочитувало.
„И покрај претходно постигнатиот договор на три одржани состаноци со лицата инволвирани околу одржувањето на оваа манифестација да се почитуваат мерките и да нема групирање, денеска поголема група на граѓани се собра во Вевчани, без почитување на мерките односно со недозволено групирање поради што мораше да интервенира полицијата. По документирање на случајот, ќе бидат поднесени и соодветни поднесоци. Апелираме до сите граѓани заеднички да придонесеме за спречување на коронавирусот односно за зачувување на здравјето како на жителите на Вевчани, така и на сите граѓани“,
изјави портпаролот на СВР Охрид, Стефан Димоски.