Доделени се и 40 гранта на здруженија и фондации, во вкупна вредност од 29.647.474 денари
Нови уредби за финансиска поддршка на средношколци и студенти од семејства со ниски приходи, како и за естрадата и за радијата донесе Владата на синиќешната седница, што заврши пред полноќ.
Со оглед на тоа што нема информација дека е побарано продолжување на вонредната состојба, ова се веројатно последните уредби што ги носи техничката влада на Оливер Спасовски, пред да почне одбројувањето до одржување на предвремените парламенатрни избори.
Преку измени на Уредбата за формирање Фонд за помош и поддршка за справување со кризата предизвикана од ковид-19, сега и естрадните работници, како и радиодифузерите кои добиле дозвола за емитување преку јавна електронска комуникациска мрежа што не користи ограничен ресурс или преку сателит се опфатени со владините мерки за финансиска поддршка.
Усвоена е и Уредба за начин на наплата на надоместоците од страна на ЈП „Македонска радиодифузија“ од радиодифузерите кои вршат радио емитување за време на вонредна состојба. На радиодифузерите кои обезбедуваат радио емитување (радија) ЈП нема да им ги наплаќа трошоците за обезбедување енергетско напојување на радиодифузни уреди за 2020 година и трошоците за закуп на деловен простор на радиодифузни објекти на ЈП МРД за 2020 година, определени со Ценовникот на услуги на јавното претпријатие.За радиодифузерите кои веќе ги платиле надоместоците за оваа година ќе се смета дека извршиле плаќање на надоместоците за 2021 година.
Владата донесе Одлука за распределба на финансиски средства наменети за финансиска поддршка на здруженија и фондации за мерки за справување со ковид-19 кризата, со која се доделени 40 гранта на здруженија и фондации, во вкупна вредност од 29.647.474 денари.
Владата даде согласност за ваучери за средношколци кои доаѓаат од семејства со ниски приходи во максимален износ до 3.000 денари, за да се искористат за купување на училишен прибор.
Донесена и Уредбата за издавање на ваучери на млади лица за стекнување со информатичко-технолошки и дигитални вештини заради подобрување на нивната конкурентност на пазарот на труд. Средствата за спроведување на оваа Уредба се обезбедени преку МОН, во вкупен износ од 150.000.000 денари.
Усвоена е и Уредба со законска сила за плаќање на дел од партиципацијата за студенти запишани за првпат на прв циклус на студии на јавните високообразовни установи во Северна Македонија, партиципација за сместување во студентски дом и партиципација на трошоците за приватно сместување на студенти чие образование се финансира од буџетот на Северна Македонија, а се од семејства со ниски приходи. Студентите опфатени со оваа уредба можат да искористи само една од партиципациите која е еднократна и изнесува до 6.000 денари.