Во скопската Зоолошка градина има помор на животните и епидемија, од установа – радост за сите генерации, Зоолошката се претвори во логор, обвинуваат од ВМРО-ДПМНЕ. Членот на градскиот комитет на ВМРО-ДПМНЕ, Стефан Кирков, обвини дека по само две години владеење на градоначалничката Данела Арсовска оваа установа се претвори во куќата на стравот и го загуби статусот за потенцијална членка на Европската асоцијација за зоолошки и аквариуми.
„Во последниве месеци имаме голем помор на животни и сето тоа пред целокупната јавност умешно низ ПР-пропаганда се сокриваат причините за истото. Пред само 24 часа Скопје ЗОО ги загуби трите коњи од расата „прежевалски коњ“ кои важат за едни од најретките коњи во светот, кои се вистинско богатство и раса која е пред исчезнување и заштитена со закон. И додека Арсовска, која зема плата 2.000 евра и во моментов повторно е на посета по скапите метрополи, и после 24 часа немаме никакво известување од ПР-службите на оваа установа, ниту од Град Скопје, умешно се молчи со цел да се сокријат причините за смртта на коњите и целокупниот помор којшто се случува во моментов во скопската Зоолошка градина“
рече Кирков.
ОД ВМРО-ДПМНЕ бараат одгвори дали поморот на животни се должи од нездравата исхрана со која се прехрануваат животните и дали е точно дека патолошкиот наод од смртта на жирафата покажал присуство на салмонела која исто е создадена од неправилна расипана исхрана?
„Оттука јавно сакаме да ја прашаме установата ‘Скопје ЗОО’ и Данела Арсовска како одговорна, ако на секои три месеци се распишува тендер за набавка на свежа храна во износ од десеттици илјади евра, како истото е можно и зошто животните се хранат со донирана непроверена храна, за која не постои технолог вработен во оваа установа за проценка на квалитетот на храната и дали треба да се хранат животните со истата? Каде завршува храната која редовно се дистрибуира од постапките коишто се со завршен тендер и потпис?“,
додаде Кирков.
Од ВМРО-ДПМНЕ бараат истрага и ги повикуват државните институции детално да ги испитаат овие наоди, а од раководството и од градоначалничката Арсовска бараат оставка.
Во последните два дена беше пријавено дека се угинати три коњи во скопската Зоолошка. Сомневањата, според она што било пријавено завчера во полиција, се дека дека животните биле отруени.
За сомнежите дека станува збор за намерно труење, за агенцијата посведочиле вработени во Зоолошката градина, кои рекле дека сè се случило премногу брзо. Во околината немало никаква друга храна, коњите не давале знаци на болест претходно, а во близина имало и угината птица.
Претходно, во Зоолошката градина во мај годинава угина жирафата Каспер. По анализите беше констатирано дена се работи за инфекција со салмонела. Оваа инфекција била пронајдена во желудникот на жирафата, црниот дроб, слезината и цревата.