Претставниците на здруженијата на пезнионери се задоволни од денешната средба со владините преставници, поради како што велат, конструктивниот дијалог кој го воделе со владините претставници, а на кој беше договорено дека ќе се изнајде соодветен модел кој ќе овозможи раст на пензиите и одржливо решение на долг рок
Методологијата за порастот на пензиите ќе се менува со цел да се изнајде модел кој ќе овозможи одржливо решение на долг рок, договорија здруженијата на пензионери и владините претставници на денешната средба во Владата посветена на отпочнување на дијалогот за зголемувањето на пензиите, а следната средба е закажана за почетокот на март.
Вицепремиерот за економски прашања Фатмир Битиќи по денешната средба со претставниците на пензионерите истакна оти очекува решението да се најде максимум до 10 март, а како што изјави, ќе биде среќен тоа да се случи и многу порано. Нагласи и дека пензискиот фонд е стабилен и оти има зголемени приходи минатата година, а тенденцијата е тој тренд да продолжи.
„Тоа осигурува дека ние може да одговориме позитивно на зголемување на пензиите. Само во јануари имаме усоглсување на пензиите од три проценти. На просечна пензија тоа е околу 478 денари во апсолутен износ. Ако останеме на истиот модел, пензионерите ќе добијат најмалку уште 500 денари во јули, но ние зборуваме за нов модел на усогласување кој ќе понуди повеќе од тоа“,
изјави Битиќи, порачувајќи дека нема да направат модел кој ќе значи за две години нестабилност на пензискиот фонд.
Пензионерските здруженија, пак, до Владата предложиле модел за покачување на пензиите кој би ги следел промените на животниот стандард и промената на просечните плати, а оттаму се уверени и дека, како што велат, „пензионерите ќе добијат највисоко историско зголемување на пензиите во периодот што следи“
Претставничката од од Здружението на пензионери, Станка Трајкова истакна дека денеска се задоволни од денешната средба затоа што во Владата спровеле конструктивен дијалог. Таа меѓу другото додаде и оти е потребно изнаоѓање на законско решение кое не само што би обезбедило сигурност на корисниците на пензија, туку истовремено би било одржливо решение на подолг рок.
Според министерката за труд и социјална политика Јована Тренчевска, треба да се создаде систем кој ќе овозможи сигурност за пензионерите, додавајќи дека покачувањето на пензиите нема да зависи од ничија политичка волја ниту од тоа дали ќе има избори.
Бенефит од зголемувањето на пензиите треба да имаат околу 328 илјади пензионери.