Бранителот на Костадинова, адвокатот Звонко Давидовиќ, рече дека ќе ја почека писмената пресуда, по што ќе одлучи дали ќе поднесе жалба
Јасмина Костадинова, соработничка во Министерството за земјоделство, е осудена на десет месеци затворска казна откако призна вина во случајот за злоупотреба на ИПАРД-фондовите. Костадинова е првата од деветтемина обвинети која доби пресуда во овој процес за корупција и противзаконито влијание.
Костадинова призна дека примила награда од 2 000 евра за да ѝ помогне на фирма која не ги исполнувала законските критериуми да добие пари од европските програми. Иако таа побара да ѝ бидат вратени преостанатите 6 000 евра пронајдени при претресот во нејзиниот дом, судот донесе одлука за целосна конфискација на сите пронајдени 8 000 евра.
Во затворската казна ќе ѝ биде пресметано и времето поминато во куќен притвор од ноември минатата година.
„Обвинетата ја искористила својата внатрешна позиција и познавањето на процедурите за да овозможи заобиколување на законските критериуми, со што директно го поткопала авторитетот на државната администрација“,
изјави судијката Ленка Давиткова.
Бранителот на Костадинова, адвокатот Звонко Давидовиќ, рече дека ќе ја почека писмената пресуда, по што ќе одлучи дали ќе поднесе жалба.
„Факт е дека обвинетата јасно и недвосмислено го призна кривичното дело, што е голема доблест и што влијаеше и на висината на изречената казна“,
изјави Давидовиќ.
Обвинителката Наташа Поп Трајкова посочи дека пресудата не е правосилна и не треба да се прејудицира со висината, посочувајќи дека казната затвор што ѝ се заканува согласно законот е од една до десет години.
За другите осуммина обвинети процесот продолжува на 11 мај.
Инаку, меѓу обвинетите во предметот е и поранешниот директор на Агенцијата за финансиска поддршка во земјоделството Илија Стоилев. Првообвинет, пак, е Џевдет Насуфи, поранешен министер за правда и за локална самоуправа во владата на Љубчо Георгиевски.
Според Обвинителството, тој како директор на фирмата „Сигнас-арго“ од струшко Велешта, се товари дека им дал 5 000 евра на тројца луѓе да влијаат на Стоилев, кој требало да добие 50 000 евра за да стави потпис на проектот на фирмата за да добие пари од програмата ИПАРД 3. Полицијата, според обвинението, го фатила Стоилев со првите 400 евра дадени на рака.
По откривањето на случајот, Европската комисија ја стопира исплатата на 2,9 милиони евра од ИПАРД-програмата, кои требаше да легнат на сметката на државата до крајот на јануари годинава. Минатата недела ресорното Министерството информира дека парите се конечно одблокирани.