Основното јавно обвинителство Кавадарци поведе постапка против лице кое од август до декември годинава му се заканувало на градоначалникот на Каварадци Митко Јанчев и на неговото семејство.
Се работи за 40 годишен кавадарчанец за кого Обвинителството смета дека постои основано сомнение за две кривични дела – Загрозување на сигурноста од член 144 став 4 и Насилство од член 386 став 3 во врска со став 1 од Кривичниот законик.
„Во текот на неколку месеци, започнувајќи од август до 29 декември 2019 година, осомничениот во повеќе наврати психички го малтретирал и навредувал градоначалникот на Кавадарци и неговото семејство, со што кај нив предизвикал чувство на несигурност, загрозување и страв. Психичкото насилство започнало со закани и објавување статии со клевети и навреди по социјалните мрежи“, се вели во соопштението од ОЈО.
Исто така осомничениот повикувал и други лица, го следел Јанчев и неговото семејство, ја фотографирал куќата во која тие живеат и преку нивни роднини им упатувал сериозни закани.
Тој бил пријавуван во полициската станица во Кавадарци, од каде иако бил опоменуван повеќепати, тој продолжил да врши психичко насилство и да ја загрозува сигурноста на Јанчев.
„Насилството кулминирало вечерта на 28 декември, откако осомничениот поради фотографирање на домот на градоначалникот бил повикан во полициска станица, а во негово име на оштетениот телефонски му се јавило друго лице, упатувајќи му сериозни закани. Заканите продолжиле и од страна на осомничениот , упатени преку социјални мрежи, во кои тој повикува градоначалникот ‘да плати со крв и месо’“, појаснуваат од ОЈО.
Поради ова, кавадарчанецот се гони за загрозување на сигурноста, бидејќи со заканата упатена преку социјалните мрежи се заканувал дека ќе стори кривично дело за кое е пропишана казна затвор од најмалку 5 години. Со психичко малтретирање на градоначалникот и на членовите на неговото семејство, кај кои предизвикал чувство на несигурност, загрозување и страв, осомничениот ги исполнил елементите на кривичното дело насилство.
На осомничениот му е определн притвор во траење од 8 дена бидејќи обвинителот проценил дека за тоа има законските основи и дека постои можност осомничениот да го повтори делото (заканите) или да го изврши делото со кое се заканува.