Проектот треба да биде спроведен во три фази, од кои првата е веќе почната и рамките на која во Дебар и во Делчево здравствени услуги се обезбедуваат од далечина од главниот град, Скопје, додека втората и третата ќе се однесуваат на вклучување на лекари од дијаспората
Министерот за здравство Азир Алиу соопшти дека недостатокот на лекари во одредени градови и средини во земјава ќе се решава со вклучување на лекари од дијаспората кои преку т.н. медицина од далечина или телемедицина ќе даваат услуги за македонските пациенти онлајн, а проектот, како што се наведува во соопштението од ресорното Министерство, веќе е во почетна фаза.
Според министерот Алиу, телемедицината ќе биде еден од клучните столбови за подобрување на здравствениот систем и справувањето со недостигот на лекари во земјата.
„Денес имаме голем број лекари во дијаспората кои се многу добри специјалисти, работата на високо ниво и се почитувани во земјите каде што работат. Ние не сакаме овој човечки капацитет да остане нискористен“,
се вели во соопштението од МЗ, во кое е пренесена изјавата на ресорниот министер.
Како што наведува тој, со помош на технологијата ќе се овозможи овие професионалци да придонесуваат директно или од далечина во здравствениот систем на Македонија. Алиу информира дека имал директна комуникација со претставници на академските институции, од каде многумина изразиле подготвеност да го дадт својот придонес и без финансиски надомест.
Проектот, се наведува, треба да биде спроведен во три фази, од кои првата е веќе почната.
Во почетната пилот-фаза, телемедицина веќе се практикува во Дебар и во Делчево, каде што здравствени услуги се обезбедуваат од далечина, во случајов од главниот град, Скопје.
„Првата фаза е пилотирање, додека втората фаза ќе се фокусира на стандардизација на процедурите за телемедицина, со цел системот да се прошири и да ги вклучи лекарите кои работат надвор од земјата“,
вели Алиу.
Третата фаза, додава министерот, ќе вклучува развој на дигитални системи за напредни анализи, особено во областа на радиологијата, преку, кои лекарите специјалисти од дијаспората ќе можат да даваат професинални мислења за случаите кои се третираат во здравствените институции во земјава.
Министерот Алиу е оптимист дека телемедицината не само што ќе помогне во подобрувањето на пристапот до здравствени услуги, туку ќе создаде мост за одржлива соработка со лекарите од дијаспората.