Ставот на премиерот Заев во интервјуто за БГНЕС, бугарскиот вицепремиер го нарече мал чекор во вистинска насока
Бугарскиот вицепремиер и министер за одбрана Красимир Каракачанов денеска го поздрави ставот на премиерот Зоран Заев во интервјуто за бугарската новинска агенција БГНЕС, нарекувајќи го „мал чекор во вистинска насока“ и оцени дека ако се оди со оваа брзина, може Северна Македонија да ги започне преговорите со ЕУ, пренесува бугарската телевизија Би-ти-ви.
„Тој собра храброст, поради што некои од неговите противници го критикуваат. Ова е мал чекор во вистинска насока. Ако одиме напред со толку брзи чекори, мислам дека следната година можеме да зборуваме за започнување на преговарачкиот процес“,
рече бугарскиот вицепремиер во Велико Трново, каде што зборуваше на прославата на Националниот воен универзитет „Васил Левски“.
Но, Каракачанов додава дека сепак тој не верува во декларации и интервјуа, туку сака да види што ќе се направи на дело.
„До пред два месеца, некои работи што ги кажа сега – за заедничката историја, за некои заеднички херои – беше незамисливо да ги слушнеме. Ова е чекор напред. Историјата е заедничка, но треба да појасниме каква. Таа е заедничка, но сепак таа е бугарската историја“,
рече бугарскиот вицепремиер.
Тој истакна дека сега на Бугарија ѝ требаат конкретни гаранции. Според него, тие не можат да бидат поткрепени само со декларација и нагласи дека е потребно да се склучи писмен документ – потпишување анекс или нов договор.
„Кога – со рокови, бидејќи самиот процес на преговори е долг. Може да трае до 10 години. Сепак, за да се согласиме да започнеме, сакаме пишан план. Ние сакаме овој услов да биде многу јасен во договорот со ЕУ и да биде јасно дека можеме да го запреме овој процес во секое време доколку договорот меѓу Бугарија и Македонија не биде исполнет од нивна страна“,
нагласи Каракачанов.
Според него, Бугарија треба да направи чекор и смело да ги брани своите интереси.
„Всушност, станува збор за бугарски национален интерес. Можеби сме помала земја во ЕУ, но имаме достоинство и имаме право да го браниме. Ова е она што Бугарија мора да го стори, да ги брани своите интереси“,
вели Каракачанов.