Дел од кандидатите имале свои услови, од дебатата да се изземат некои од нивните ривали, пред сè Стевчо Јакимовски бидејќи е на „црната листа“ на САД и Билјана Ванковска поради нејзините наративи, но од штабот на Пендаровски велат дека тоа не е можно
Изборните штабови на шестемина претседателски кандидати одговориле позитивно на иницијативата на претседателскиот кандидат на СДСМ, Стево Пендаровски, да се одржи мастер дебата на која сите претенденти за шеф на државата ќе имаат можност да ја претстават својата програма и својот концепт за тоа како ќе ја водат државата доколку победат, брифираат од изборниот штаб на Пендаровски.
Дел од кандидатите имале свои услови, од дебатата да се изземат некои од нивните ривали, пред сè Стевчо Јакимовски бидејќи е на „црната листа“ на САД и Билјана Ванковска поради нејзините наративи, но од штабот на Пендаровски велат дека тоа не е можно.
„Државната изборна комисија потврди дека има седум кандидати за претседател на државата и за нас не постојат спорни кандидати. Го почитуваме гласачкото тело на сите кандидати и кога некој претендира да стане претседател на државата треба да го има предвид фактот дека тој е претседател на сите граѓани. Нашата идеја е дебатата да се одржи со сите седум кандидати и добро е што имаме позитивен одговор од сите штабови. Не можеме да кажеме финално дека ќе има дебата бидејќи во следниот период штабовите ќе треба да ги договорат техничките аспекти. Организацијата и трошоците за мастер дебатата ќе бидат заеднички“,
посочија од изборниот штаб на Пендаровски на денешниот брифинг со новинарите.
Оттаму додаваат дека најверојатно ќе има само една мастер дебата, бидејќи времето не дозволува да се одржат две и таа би се реализирала на почетокот од кампањата, односно, планот е таа да се одржи до 10 април.
Конвенцијата со која ќе биде одбележан стартот на изборната кампања за Пендаровски и на која тој ќе ја претстави својата програма, наместо на 3 април, поради технички причини, ќе се одржи на 2 април во салата „Борис Трајковски“.
Кампањата на Пендаровски официјално ќе почне на 4 април во Скопје со отворање на изборниот штаб во центарот на градот. Планирано е, велат од изборниот штаб на Пендаровски, тој во текот на кампањата да посети околу 60 населени места.
Вечерва Пендаровски, кој е и актуелен шеф на државата, во Клубот на пратеници ќе организира ифтарска вечер, на која се поканети претставници на ИВЗ и неговите противкандидати за претседател. Ваква вечера, како што соопштија од неговиот штаб, Пендаровски ќе организира и за Велигден.
Поканата за ифтарска вечера претходно јавно ја отфрли кандидатката за претседател на Левица, Билјана Ванковска, која преку социјалната мрежа Фејсбук посочи дека нејзиното „разбирање на демократската политика е во духот на секуларноста, на која впорчем нѐ обврзува и Уставот“. Таа истакна дека нема да прифати ниту евентуална покана за велигденска вечер.