„Животот на мојата генерација се одвива преку таа дигитализација – од приватниот живот, забавата, па и до професионалниот ангажман, аплицирањето на универзитети, примањето е-услуги, купувањето на интернет. Така што, оваа генерација е директно изложена на дигитализацијата од самиот почеток, од тој аспект и млад човек може да се снајде во тој ресор“, вели Андоновски
Мојата генерација растеше со дигитализацијата од нејзините почетоци и научена е да мисли на тој начин – дигитализирано, вели во интервју за „360 степени“ на МРТ 1 министерот Стефан Андоновски кој раководи со новоформираното Министерство за дигитална трансформација. Како најмлад министер во владата на Христијан Мицкоски, прашан дали човек на 33 години може да се носи со одговорноста што ја подразбира министерска позиција, тој вели дека Македонија имала и помлади министри и премиери, но и дека е важно кој какви задачи добива во владата.
„Животот на мојата генерација се одвива преку таа дигитализација – од приватниот живот, забавата, па и до професионалниот ангажман, аплицирањето на универзитети, примањето е-услуги, купувањето на интернет. Така што, оваа генерација е директно изложена на дигитализацијата од самиот почеток, од тој аспект и млад човек може да се снајде во тој ресор“,
вели Андоновски.
Колку му е близок ресорот дигитална трансформација, со оглед на тоа што единствената директна допирна точка со оваа област во образовниот процес и во работното искуство му е периодот кога бил специјалист по дигитален маркетинг на проект на УСАИД, беше следното прашање до министерот.
„Пред проектот на УСАИД, работев во приватниот сектор. Бев многу изложен на дигитални алатки кои како консумент, често кажувам, сум ги користел во работењето. Тоа се внатрешни системи за раководење со документи, но и комуникација со странство, комуникација преку социјални медиуми во врска со продажба, така што, тоа што го зборувам за мојата генерација изложена на интернет – истото би важело и за мојот професионален ангажман кој значел постојано користење на дигиталните алатки во работата. Но, од страната како консумент, а не како некој што ги развивал тие апликации. Значи, не сум инженер по занимање“,
вели министерот за дигитална трансформација.
Со оглед на тоа што има магистратура по меѓународна политика и меѓународна економија од престижната школа за меѓународна политика на Универзитетот „Џонс Хопкинс“ во САД, Андоновски беше прашан и дали не беше пологично да добие ресор поврзан со меѓународните односи, како што се, на пример, надворешни работи, одбрана, европски прашања…
„Поврзаноста што дигитализацијата ја има со нашите меѓународни партнери беше многу важна за премиерот Мицкоски да одлучи мене да ме предложи во овој ресор, затоа што капиталните инвестиции и поврзувањето на Македонија со регионот и светот во овој ресор има големо влијание. И мислам дека заинтересираноста на нашите меѓународни партнери од ЕУ, но и нашите стратешки партнери за сајбер-безбедноста, за градењето на квалитетна заштитена дигитална инфраструктура, но и поврзувањето со ЕУ, САД и другите меѓународни партнери и исполнувањето на стандардите кои ЕУ ги има поставено за нас, значеше дека некој што има меѓународно искуство, има изложеност со меѓународните партнери и има контакти во светот поврзани со дигитализацијата, требаше да го заземе местото во овој ресор“,
вели министерот за дигитална трансформација.