Од ВМРО-ДПМНЕ за тројцата извесни кандидати за лидерската позиција во СДСМ велат дека не можат да донесат ништо ново во оваа партија
Најавените кандидатури на Венко Филипче, Славјанка Петровска и Јован Деспотовски за претседател на СДСМ покажуваат дека оваа партија продолжува по истиот пат, без нови идеи и нов правец, велат од ВМРО-ДПМНЕ.
Во соопштение оттаму наведуваат дека тројцата извесни кандидати за највисоката функција во СДСМ, кои им „асистираа“ на поранешните лидери на оваа партија, Зоран Заев и Димитар Ковачевски, сега сакаат да ги заменат.
„Во СДС нема свежина, нема нови идеи ниту, пак, нов правец. Венко Филипче е министерот за здравство кој во ек на корона туркаше матни тендери и бркаше милионски провизии. Славјанка Петровска е министер за одбрана која народот ќе ја памети по криењето на луксузната хациенда. Јован Деспотовски е директорот на ФИТР, каде што се даваа грантови за сè само не за иновации. Кадрите на Заев и Ковачевски не можат да донесат ништо ново“,
велат од ВМРО-ДПМНЕ.
Ексминистерот за здравство и актуелен пратеник Венко Филипче, поранешната министерка за одбрана и актуелна пратеничка Славјанка Петровска и директорот на Дирекцијата за технолошки индустриски развојни зони (ТИРЗ), Јован Деспотовски, денеска се очекува да ги поднесат своите кандидатури за претседател на Социјалдемократскиот сојуз на Македонија (СДСМ).
Како можен кандидат за лидерската позиција во СДСМ се споменуваше и актуелниот директор на Царинската управа, Стефан Богоев, но досега за ова нема официјална потврда.
Постапката за кандидирање започна на 31 мај и трае до утре. Право да поднесат претседателска кандидатура имаат сите членови на СДСМ што ги исполнуваат критериумите, меѓу кои, да имаат најмалку петгодишно членство во СДСМ и најмалку еднаш да биле избрани од партискиот конгрес за член на некој од органите на партијата.
Внатрепартиските избори во СДСМ се закажани на 30 јуни, а следуваат по оставката на лидерот Димитар Ковачевски кој по поразот на двојните избори поднесе оставка заедно со раководството на партијата. В недела, на 9 јуни, социјалдемократите ќе одржат отчетен конгрес на кој ќе се анализираат причините за изборниот резултат.