Во споредба со минатата година, од ЈПДП велат дека во 2024 има 270 милиони денари или над 4,32 милиони евра повеќе
Минатата година на патарините во државата поминале 62 662 988 возила, а наплатата изнесува 99,2 проценти, информираат од Јавното претпријатие за државни патишта (ЈПДП).
Од ЈПДП велат дека 2024 година е заокружена со остварен приход од над 66,5 милиони евра по основ на наплата на патарини, што во споредба со минатата година има 270 милиони денари или над 4,32 милиони евра повеќе.
Од претпријатието велат дека за намалување на бројот на неплаќачи, во периодот од август до декември 2024 година организирале 23 акциски контроли заедно со Државниот инспекторат за транспорт и со асистенција од МВР.
Констатацијата на јавното претпријатие е дека 2024 била повеќе од успешна година.
Оттаму информираат и за учеството на електронската наплата која се движи околу 33 проценти.
„Од отпочнување на електронската наплата на 3 јули 2019 до 20 декември 2024 година, продадени се вкупно 242 080 електронски уреди од кои, 203 828 м-смарт картички и 38 252 м-таг уреди. За тој период направени се вкупно и 1 842 224 поединечни надополнувања на електронските уреди на различни суми, а вкупната сума за надополнувања досега изнесува 3 509 815 300 денари“,
се вели во соопштението од ЈПДП.