Јовев вели дека ќе продолжи со борбата затоа што е сигурен дека министерот ќе ја поправи оваа грешка, а себеси се гледа во Клиниката за кардиохирургија, заедно со неговиот тим, со кој ќе постигнуваат уште поголеми успеси
Понудата да биде национален советник за кардиохирургија е голема чест, но професорот Сашко Јовев вели дека неговото место е сепак на Клиниката за кардиохирургија.
Јовев вели дека ќе продолжи со борбата затоа што е сигурен дека министерот ќе ја поправи оваа грешка, а себеси се гледа во Клиниката, заедно со неговиот тим, со кој ќе постигнуваат уште поголеми успеси.
„Сметам дека моето место е на Клиниката за кардиохирургија, да го водам својот тим и заеднички да постигнуваме уште многу успеси“,
рече Јовев денеска, а додека ја даваше изјавата, со него беше проф. д-р Горан Димитровски, претседател на Македонското лекарско друштво.
Димитровски, пак, во името на целото Друштво го изрази незадоволството од одлуката на Министерството за разрешувањето на Јовев.
„Разрешувањето на професор д-р Сашко Јовев од место директор на Кардиохирургија деновиве ја бранува јавноста и лекарската фела, пред сѐ од причина што образложението на Министерството за здравство за оваа постапка сметаме дека е неиздржано и небулозно. За лекар кој првпат во Македонија направил трансплантација на срце и досега заедно со својот тим, кој тој го формирал, и на светски стручно ниво вршел и други трансплатации на срце, како и интервенции со кои се спасени многу животи од други заболувања на срце кај пациенти, оваа одлука навистина е неразибрлива. Македонското лекарско друштво е против ваквата одлука на министерот за разрешување на Јовев и изјавата дека не му требаат директори кои шест месеци не дале резултати е неоснована“,
рече Димитровски.
Тој нагласи дека оваа одлука е лоша порака за младите лекари, бидејќи се разрешува некој кој постигнува резултати на национало и на интернационално ниво.
„Сметаме дека одлуката на Министерството за разрешување на професорот Јовев сепак ќе се повлече и дека ваквите врвни, стручни лекари македонското здравство и институциите на системот ќе знаат да ги зачуваат, почитуваат и наградуваат наместо да ги казнуваат“,
нагласи Димитровски.
Јовев, кој беше разрешен од позицијата директор на Универзитетската клиника за државна кардиохирургија, вчера на прес-конференција рече дека во последниот период бил изложен на големи притисоци и дека причината за неговото разрешување, како што е наведено во решението, се две дежурства во 2022 година за кои не добил согласност од тогашниот министер за здравство.
Тој смета дека не е жртва на политички реваншизам, но неговото разрешување, како што рече, веќе преминува во такво нешто.
Министерот Фатмир Меџити, пак, рече дека апсолутно не стои политика зад разрешувањето на директорот на Клиниката за кардиохирургија Сашко Јовев.