Трагедиите со кои се соочува српското општество се аларм и за нас како орган на кривичниот прогон и нè принудуваат како институции да се мобилизираме за што поефикасна контрола на оружјето и во нашата земја, вели Јовески
Ако се имаат предвид огромните штетни последици што можат да бидат предизвикани од недозволеното држење на оружје, за сторителите на ваквите кривични дела не треба да има ублажување на санкциите, вели државниот јавен обвинител Љубомир Јовески кој денеска упати порака до јавните обвинители да дејствуваат за зајакнување на казнената политика за недозволено држење оружје и муниција.
„Барам од сите јавни обвинители во државава, при постапувањето, да инсистираат на построги кривични санкции за кривичното дело – Недозволено изработување, држење и тргување со оружје или распрскувачки материи. Заострувањето на казнената политика мора да се одразува во постапувањето најпрвин на основните јавни обвинителства, кои треба да внимаваат висината на санкцијата за вакви кривични дела да се движи во рамките на законски определениот распон без можност за алтернативна мерка. Покрај ова, вишите јавни обвинителства, во случаите на определена блага санкција со првостепените пресуди, мора да се обидуваат преку постапките во втор степен да издејствуваат повисоки казни“,
стои во пораката на Јовески до јавните обвинители.
Тој во пораката до обвинителите изразува длабоко жалење и вели дека со загриженост ги следи настаните во соседна Република Србија, каде што во оружени напади во претходните денови беа убиени повеќе лица.
„Трагедиите со кои се соочува српското општество се аларм и за нас како орган на кривичниот прогон и нè принудуваат како институции да се мобилизираме за што поефикасна контрола на оружјето и во нашата земја“,
вели Јовески.
Според него, оружјето е средство за извршување и на многу други кривични дела и неговата употреба надвор од законските рамки не смее да се толерира.
Јовески нагласува дека трендот на намалување на возрасната граница на сторители на тешки кривични дела се забележува и во постапувањето во нашата земја.
„Тоа е нешто што загрижува и за што во најскоро време треба да бидат преземени конкретни превентивни активности од сите надлежни институции“,
вели Јовески.
Тој додава дека Јавното обвинителство е подготвено активно да се вклучи со свој придонес во секоја евентуално иницирана јавна расправа со цел измена на законските одредби во таа насока.