Шефот на изборниот штаб на ВМРО-ДПМНЕ, Игор Јанушев, предмалку на прес-конференција изјави дека резултатот од изборите значи дека неговата партија влегува во трка за составување нова влада.
„Донтовиот модел ја прави оваа трка доста неизвесна, но факт е дека промените народот ги посакува. Народот покажа дека не сака влада која е криминална и коруптивна. Народот сака обнова. Опозицијата на овие избори покажа дека има повеќе гласови од партиите на власта. ВМРО-ДПМНЕ влегува во трка за составување на мнозинство за нова влада затоа што постојната е истрошена и време е за промени“,
изјави Јанушев.
На новинарските прашања за партиските пресметки за распределба на мандатите, Јанушев не сакаше да навлезе во повеќе детали.
„Во моментов, како што кажав, трката е неизвесна. Така што, ќе почекаме веројатно до утринава за да ги видиме конечните резултати. Многупати досега сме го кажале кој и со кого би можело да се преговара за идната влада, сепак да почекаме и да видиме и финално како ќе бидат поделени мандатите“,
изјави Игор Јанушев