Коалицискиот партнер на ВМРО-ДПМНЕ, претседателот на ПОДЕМ, Живко Јанкулоски, повикува да се блокира работата на Собранието. Тој на денешниот антивладин протест организиран од ВМРО-ДПМНЕ ги повика опозициските пратениците да ја сопрат работата на Собранието.
„Морате да ја блокирате работата во Собранието сѐ со цел да се спречи ова што ни се спрема за да се уништи Македонија и да се уништи сѐ што е македонско. Мораме сите заедно да ѝ помогнеме на Македонија, сите обединети. Ги повикувам сите, и политички партии, меѓутоа и граѓани, да се придружат на ова обединување. Ова не е само за нас, ова е за сите граѓани на Република Македонија, за доброто на граѓаните на Република Македонија“,
рече Јанкулоски во неговото обраќање на протестот пред Владата.
Тој побара и оставка од премиерот Зоран Заев, за како што рече, да се спречи продажбата на Македонија.
„Мораме да го запреме на секаков начин во намерата да го тргува македонскиот јазик, идентитет и историја. Обезличени и со свиткана кичма за да ги отпочнеме преговорите со ЕУ кои имам впечаток дека, за жал, никогаш нема да завршат. Како такви без идентитет јазик и историја, ниту нас ни е потребна Европска Унија, а ниту ние и требаме на Европската Унија“,
рече Јанкулоски.