Прашана дали постои конкретен план за задржување на младите во државата бидејќи Словенија веќе со години ги зема најдобрите студенти од земјава, ресорната министерка оцени дека станува збор за комплексен процес што бара повеќе паралелни чекори, меѓу кои модернизација на студиските програми, подобрување на студентскиот стандард и поголема поврзаност на образованието со пазарот на труд
Средствата што Европската комисија ѝ ги одобри на Македонијна во рамките на Механизмот за реформи и раст, кој е дел од Планот за раст на ЕУ за Западен Балкан, во најголем дел ќе се слеат во државниот буџет, а за нивната понатамошна распределба ќе одлучува Министерството за финансии, изјави денеска министерката за образование и наука Весна Јаневска, додавајќи оти очекува поддршка за образовниот сектор бидејќи претстојат нови реформски чекори.
За потсетување, Европската комисија неделава одобри и стави на располагање финансиски пакет во износ од 158,9 милиони евра за Северна Македонија, Албанија и Црна Гора, во рамките на Механизмот за реформи и раст, кој е дел од Планот за раст на ЕУ за Западен Балкан. Од вкупната сума, за Северна Македонија се издвоени 65,7 милиони евра, како потврда за посветеноста на земјата кон реформите, а фокусот на оценетите реформи кај нас беше ставен на областите на образованието и дигитализацијата.
Од одобрените средства за земјава, 30,6 милиони евра ќе бидат директно префрлени во државниот буџет, а преостанатите ќе бидат достапни за инвестициски проекти преку Инвестициската рамка за Западен Балкан.
Министерката за образование денеска, одговарајќи на новинарски прашања пред почетокот на одбележувањето на 77-годишнината од постоењето на Универзитетот „Св. Кирил и Методиј“ во Скопје, рече дека престојат нови реформски чекори за кои се потребни европски средства. Таа наведе оти во изминатиот период се донесени нови модели за финансирање и дека е подобрена инфраструктурата во училиштата.
„Средствата што ќе ги додели Европската Унија за исполнување на чекорите од европската агенда во најголем дел ќе одат во буџетот на државата, а за тоа колку од тие средства ќе бидат наменети за Министерството за образование и наука ќе одлучи министерката за финансии. Длабоко верувам дека ќе има разбирање бидејќи имаме дополнителни чекори што треба да ги исполниме, а за кои не се потребни значителни средства, со цел повторно да можеме да добиваме средства од Европската Унија“,
рече Јаневска.
Прашана дали постои конкретен план за задржување на младите во државата бидејќи Словенија веќе со години ги зема најдобрите студенти од земјава, ресорната министерка оцени дека станува збор за комплексен процес што бара повеќе паралелни чекори, меѓу кои модернизација на студиските програми, подобрување на студентскиот стандард и поголема поврзаност на образованието со пазарот на труд.
„Еден од чекорите е подобрување и модернизација на студиските програми на нашите универзитети, при што со новиот закон се предвидуваат промени во високото образование, на пример, модуларност при учење, поттикнување интердисциплинарни студии, кои се соодветни на пазарот на труд, како и разгледување на квотите за упис на одредени универзитети и факултети… Се обезбедуваат и значителен број стипендии за студентите и таа пракса ќе продолжи. Сметаме дека се потребни разни типови стипендии во зависност од потребите на студентите… Работиме и на подобрување на поврзаноста меѓу образованието и пазарот на труд, со цел студентите побргу да се вклучат во работниот процес. Новиот закон предвидува и приоритет за најдобрите студенти при вработување на универзитетите. Се преземаат повеќе чекори во оваа насока“,
рече Јаневска.
Министерката информира дека два студентски дома се веќе реновирани според европски стандарди, а за другите седум се очекува да почне реконструкција од октомври.
„За жал, во изминатите години ниеден студентски дом не беше реновиран, а сега веќе имаме два реновирани, кои од октомври ќе примаат студенти според европски стандарди. Од октомври почнуваме со реновирање на другите седум, што значи за една и пол до две години студентите ќе имаат навистина европски услови, каде што ќе може да учат и да живеат, односно да имаат пристоен живот додека студираат“,
изјави Јаневска.
Во одговор на новинарско прашање поврзано со спроведените реформи, Јаневска вели дека постојат дезинформации во јавноста, иако, според неа, има јасни показатели за спроведените реформи.
„За жал, постојат дезинформации иако имаме јасни показатели за спроведените реформи. Сè уште има мал дел од јавноста што верува во таквите дезинформации, иако претходно постоеше можност да се направат овие промени, но тоа не беше сторено. Измените и дополнувањата на законите носат придобивки за студентите. Во однос на прашањето за стипендиите, сакам да појаснам дека бројот на стипендии не се намалува. Напротив, врз основа на направена анализа за изминатите пет години, утврдивме дека речиси 400 стипендии наменети за социјални категории не биле искористени. Причината е што бројот на студенти што ги исполнуваат условите за овие категории бил помал, па тие стипендии останувале недоделени. Врз основа на овие анализи преземаме мерки за поефикасно користење на средствата“,
додаде Јаневска.