Според бугарскиот премиер, исполнувањето на Договорот за добрососедство се одвива бавно, додека заедничката комисија за историски и образовни прашања не постигнала ништо досега
Решението на прашањето меѓу двете земји е во политичарите. На историчарите не треба да им се остава да бидат предводници во политиката, затоа што политиката е одговорност на владите, вели во интервју за МИА бугарскиот премиер Стефан Јанев.
Во интервјуто што ќе биде објавено утре, Јанев вели дека е потребно двете влади да седнат и прагматично да разговараат што може да се направи, за да се постигне решение.
„Историчарите се луѓе на науката. Според мене, луѓето од науката треба да се занимаваат само со наука, да си ги докажуваат тезите, се разбира, врз база на факти и докази со неопходната сериозност и одговорност. Но ним не треба да им се остава да бидат предводници во однос на политиката, затоа што политиката е одговорност на владите. Политиката е одговорност на извршната власт, која одговара на потребите на граѓаните. Потребите на граѓаните се дефинираат преку гласање на соодветните избори, односно решението на ова прашање е во политичкиот живот и во владите на двете држави,
вели Јанев за МИА.
Според Јанев, исполнувањето на Договорот за добрососедство се одвива бавно, додека заедничката македонско-бугарска Комисија за историски и образовни прашања не постигнала ништо во нејзиното работење.
„Да, кажавме дека таа Комисија треба нешто да постигне, но очигледно е дека таа ништо не заврши. Тоа беше јасно уште првата, втората година. Треба да чекаме уште пет години таа комисија да постигне нешто? Според мене, тоа не е реално“,
оценува Јанев.
Бугарскиот премиер нагласи дека тоа е и неговиот апел, прашањето да се реши со разговор меѓу две влади.
„Се радувам што господинот Заев ќе биде наш гостин утре. Владите да седнат и прагматично да разговараат што може да се направи, затоа што, како што веќе кажав, при сета добронамерност која беше изразена при потпишувањето на Договорот за добрососедство во 2017 година, очигледно е дека неговото исполнување не се одвива. Еве веќе сме четврта година откако е потпишан и ние немаме никаков напредок“,
вели бугарскиот премиер