Јанев навива за Македонија на фудбалскиот натпревар, а Заев вети дека бугарскиот народ ќе биде вметнат во Уставот

Пред членството во ЕУ, С Македонија ќе го отвори Уставот. Ако сакаме да сме земја членка на ЕУ, треба да имаме европски Устав и, по примерот на Хрватска, ќе ги впишеме и другите народи

Бугарскиот народ ќе биде вметнат во Преамбулата на Уставот, порача Заев во Софија, одговарајќи на новинарско прашање по средбата со бугарскиот премиер Стефан Јанев. Пред членството во ЕУ, С Македонија ќе го отвори Уставот, додаде Заев.

„Наш став е сите помалобројни народи да бидат вклучени во Уставот. Вклучително и бугарскиот, а и хрватскиот исто не е впишан. Ако сакаме да сме земја членка на ЕУ, треба да имаме европски Устав и, по примерот на Хрватска, ќе ги впишеме и другите народи“,

рече Заев.

За историската комисија Заев рече дека денешната средба во Софија е поттик за попосветена работа на историчарите кои веќе постигнаа договор за пет историски личности и три историски периоди.

„Штом ќе ги усвоиме на меѓувладина конференција и ќе ги објавиме во службен гласник понатаму следи примена во учебниците. Така ќе ги учиме младите што е историската вистина за која сме се согласиле. Убеден сум дека за се постои решение, политичарите треба да ги носат политичките одлуки, а историчарите работат експертски. Во убав амбиент политичките и големите прашања лесно се решаваат, но кога е лош политичкиот амбиент и најситното прашање е голем проблем“,

додаде Заев.

Недоразбирања околу Прличев на состанокот на мешовитата Комисија за историски прашања

Јанев се надоврза дека политичарите се тие што треба да ги носат одлуките, а не историчарите.

„Ние на Балканот сме темпераменти народи, секој има свое мислење за историјата и секогаш кога доаѓа од семејните корени е многу емоционална. Ако јавно ја отвориме дебатата за историјата, ќе биде бескрајна. Историската комисија има одговорност пред оние што ја назначиле, а тоа се политичарите и затоа транспарентноста на комисијата треба да дојде од политичарите што ја носат одговорноста“,

изјави Јанев.

Јанев за МИА: Решението меѓу Бугарија и С Македонија е кај политичарите, а не кај историчарите

Во однос на обвинувањата од Борисов дека техничката влада може да најде решение, но дека бега од одговорност, Јанев вели дека не сака да навлегува во дебата со бугарските политички лидери, но порача дека досега требало да се постигне решение ако тоа било возможно.

На крајот од прес-конференцијата, на новинарско прашање бугарскиот премиер Јанев додаде, со оглед на тоа што има гости од Скопје, ќе навива за С Македонија на денешниот фудбалски натпревар со Украина, на Европското првенство.

Заев дојде со конкретен предлог што ќе го разгледаме во наредните денови, соопшти привремениот премиер на Бугарија