Армијата на Израел, исто така, соопшти дека во неколку области во Газа нејзините војници испукале предупредувачки истрели кон маскирани лица кои им се приближувале на израелски војници
Израелската војска вчера соопшти дека убила припадник на радикалната палестинска организација „Исламски џихад“ во Појасот Газа, што е прв ваков случај од почетокот на прекинот на огнот меѓу Израел и Хамас во палестинската енклава, јавуваат светските агенции.
Во соопштението, израелската војска ги наведува и околностите во кои се случило убиството на, како што наведува, припадникот на „Исламски џихад“, организација која, како и Хамас, се смета за терористичка организација.
Според информациите, израелските војници во јужниот дел на Појасот Газа идентификувале неколку вооружени лица кои биле означени како закана, по што спровеле акција за нејзино елиминирање.
Во меѓувреме, и министерството за здравство во Појасот Газа, кое е под контрола на Хамас, потврдило дека едно лице е убиено, а четири други биле ранети.
Израелската војска, исто така, соопшти дека во неколку области во Газа, нејзините војници испукале предупредувачки истрели кон маскирани лица кои им се приближувале на израелски војници.
Истовремено, од војската додаваат дека се придржуваат до условите на договорот за прекин на огнот што стапи во сила во неделата.
„Израелската војска е решена целосно да ги исполни условите од договорот за да ги врати заложниците“,
се вели во соопштението.
Според договорот, во рамките на првата фаза од прекинот на огнот, кој треба да трае 42 дена, израелските сили треба да се повлечат од густо населените области во Појасот Газа.
Во таа насока, Армијата на Израел ги предупреди Палестинците да избегнуваат да им се приближуваат на нејзините војници.