„Кога ќе има техничкиот министер за надворешни работи на Бугарија време може слободно да прошета до Ваташа да види дел од таа традиција“, изјави претседателот на државата одгоаврајќи на новинарско прашање по денешната седница на Советот за безбедност
Претседателот на државата, Стево Пендаровски ја оцени како прилично грозна изјавата на бугарскиот министер за надворешни работи, Николај Милков, кој говорејќи во контекст на претепувањето на секретарот на бугарскиот клуб „Цар Борис Трети“, рече дека станува збор за враќање на црни времиња и „црни традиции кои историски се поврзани со Македонија“.
Одговарајќи на прашањето, Пендаровски рече дека е среќа што новинарката не ја цитирала целата изјава на „г. tехнички министер за надворешни работи“ на Бугарија.
„Таа е прилично грозна. Вели во Македонија се враќа традицијата на колежи, на стрелање вели и на насилства. Единствено таа изјава може да биде точна ако мисли на периодот 1941-1944 година и кога ќе има техничкиот министер за надворешни работи на Бугарија време може слободно да прошета до Ваташа да види дел од таа традиција“,
изјави Пендаровски.
Инаку, шефот на македонската дипломатија, Бујар Османи и неговиот бугарски колега, Милков вчера во Софија го посетија македонски државјанин од Охрид, Христијан Пендиков, кој е на лекување таму, откако беше претепан во петокот.
Изјавата Милков ја даде по посетата на Пендиков.
Во однос на тоа дали новите случувања водат кон ново вето од Бугарија за евроинтегративните процеси на земјава, претседателот рече оти искрено се надева дека одлуките на Софија нема да одат во таа насока.
„Не можам да знам што ќе направи бугарската страна, секоја држава суверено и автономно ги носи своите одлуки иако да бидам искрен не гледам ниту една основа за ново вето. Не можам да знам, се надевам дека нема да одат во таа насока бидејќи ова што го зборувам го знаете сите го живееме тоа, знаете дека станува збор за докажани инструирани провокатори кои тоа го прават“,
рече Пендаровски.