Опозициската партија обвини дека власта создава илузија дека нешто се менува со реконструкцијата на Владата, а дека во суштина сè ќе остане исто
За оваа влада да доживее вистинска реконструкција прво би требало да се реконструира премиерот – коментираат од опозицискиот СДСМ додека партиите од власта ги водат разговорите за реконструкцијата на Владата. Обвинија дека власта создава илузија дека нешто се менува со реконструкцијата, а дека во суштина сè ќе остане исто.
„Нова амбалажа, ист производ со поминат рок. Додека тие се занимаваат со преуредување на фотелји, граѓаните се занимаваат со тоа како да стигнат до крајот на месецот. Но, според Владата, тоа е ‘личен проблем’ на граѓаните, а не државен. На крајот, сè ќе биде како и досега – само со нови имиња и нови изјави за ‘историски момент’. Гаѓаните ќе продолжат да чекаат Влада која работи за нив, а не за себе“,
коментираат од СДСМ.
Оттаму велат дека за вистинска промена, прво треба да се реконструира премиерот.
„Затоа што токму тој ја води Владата, исто како што ја води и партијата. Значи – фан-клуб. Како во партијата, така и во Владата. Реконструкцијата, според нив, ќе донесе ‘повеќе одговорност, ефикасност и резултати’. Што во превод значи: ќе ги сменат оние што веќе не можат да се бранат и ќе доведат нови кои уште не се истрошени. ЗНАМ, здружението кое повеќе не постои, сега треба да предложи ‘нови’ лица. Прашањето е само дали ќе биде Максо, или ќе го рециклираат некој стар што веќе го видовме во друга улога“,
додаваат од опозицискиот СДСМ.
Премиерот Христијан Мицкоски денеска изјави дека разговорите за реконструкцијата со коалициските партнери се при крај и дека во текот на викендот сето тоа ќе се формализира и со имиња и со останати специфики.