„Со овој проект наместо во нашата држава да биде присутен само еден извор на гас сега е отворена можноста да влезе и снабдување од повеќе различни извори, како гасот од САД, Блискиот Исток и други земји“, рече премиерот Ковачевски на церемонијата за започнување на реализацијата на изградбата на терминалот за течен природен гас (ЛНГ) во Александруполи, Грција
Тоа, како што додаде премиерот, ќе значи сигурно и безбедно снабдување со природен гас од различни добавувачи и диверзификација на изворите, што Северна Македонија ќе ја направи енергетски независна
Ова е историски настан за земјите од регионот во делот на енергетиката и е проект за долгорочна енергетска независност и за стабилно и постојано снабдување со течен гас во едно исклучително кризно време, порача премиерот Димитар Ковачевски на денешната свечена церемонија на започнување на реализацијата на изградбата на терминалот за течен природен гас (ЛНГ) во Александруполи, Грција.
„Заедно со гасната централа за производство на електрична енергија, како втора фаза од овој голем проект, се обезбедува електроенергетски капацитет со најсовремена технологија за производство и снабдување со електрична енергија. Тоа значи обезбедување на капацитети во електроенергетскиот систем во регионот за стабилно снабдување со електрична енергија“,
истакна премиерот Ковачевски на церемонијата во Александруполи.
Северна Македонија, додаде Ковачевски, во овој проект учествува со договор за резервација за одреден капацитет за течен гас од Терминалот во Александруполи, а додаде оти во тек се и подготовките коишто ќе овозможат и наше директно вклучување во изградбата на гасоводот со што, како што истакна премиерот, нашата земја ќе биде поврзана со овој значаен енергетски капацитет.
„Со интерконекторот во Грција, кој е во фаза на реализација, ја заокружуваме сета потребна инфраструктура за да се заврши и секундарната гасна мрежа која ќе го донесе гасот до граѓаните и стопанството во Северна Македонија. Обезбедувањето на природен гас како енергенс за компаниите и домаќинствата ќе доведе до намалени трошоци, но и до намалување на загадувањето и заштита на животната средина, односно подобри услови за живот на граѓаните во Северна Македонија“, порача Ковачевски кој додаде дека користењето на нови извори на енергија и замена на јагленот со гас е еден од нашите најважни стратешки интереси“,
додаде премиерот.
Премиерот Ковачевски во своето излагање истакна дека гасниот терминал во Александруполи за регионот и од аспект на диверзификација и поголема сигурност во снабдувањето со природен гас, додавајќи дека јужниот коридор ја намалува зависноста од досега единствениот канал на доток на гас од Русија.
„Поточно, со овој проект наместо во нашата држава да биде присутен само еден извор на гас, сега е отворена можноста да влезе и снабдување од повеќе различни извори, како гасот од САД, Блискиот Исток и други земји. Ова значи сигурно и безбедно снабдување со природен гас од различни добавувачи и диверзификација на изворите што нашата држава ќе ја направи енергетски независна“,
посочи Ковачевски.
Сето тоа, како што нагласи Ковачевски, ќе влијае и на намалување на цената на гасот како енергенс за индустриските и енергетски капацитети во Северна Македонија, а од огромно значење е и за развој на енергетскиот сектор во регионот преку енергетската поврзаност на земјите од Централна и Југоисточна Европа.
Премиерот порача дека учеството на Северна Македонија на овој, како што го нарече, мега проект ја обезбедува привилегијата на државата во реализација на стратешките енергетски интереси на Европската Унија.
На свечената церемонија во Александруполи покрај премиерот Ковачевски, присуствуваа и премиерот на Република Грција, Киријакос Мицотакис, претседателот на Владата на Република Бугарија, Кирил Петков, со претседателот на Република Србија, Александар Вучиќ, како и со претседателот на Европскиот совет, Шарл Мишел.
На церемонијата присуствуваа и вицепремиерот за економски прашања и координација на економските ресори и инвестиции, Фатмир Битиќи, министерот за економија Крешник Бектеши, како и директорот на ЕСМ, Васко Ковачевски.