Без разлика дали станува збор за претседателски или парламентарни избори, со оглед на ситуацијата може да се очекуваат тензични изборни кампањи, а граѓаните ќе имаат одлучувачко влијание за евентуалната промена на лидерите кои подолго време се закотвени во некои држави
Годината што е пред нас ќе биде многу турбулентна и непредвидлива, ако се суди според изборите кои се очекуваат во наредните месеци во повеќе делови од Европа. Без разлика дали станува збор за претседателски или парламентарни избори, со оглед на ситуацијата може да се очекуваат тензични изборни кампањи, а граѓаните ќе имаат одлучувачко влијание за евентуалната промена на лидерите кои подолго време се закотвени во некои држави.
Изборната година во ЕУ веќе ја отвори Италија. Досегашниот претседател Серџо Матарела викендов беше избран за неговиот втор претседателски мандат.
Меѓутоа, патот до изборот на Матарела не беше воопшто лесен. До гласање дојде дури откако партиските лидери побараа од него да остане на таа функција, бидејќи по неколкудневно неуспешно гласање во парламентот, Италија не можеше да добие нов претседател. Така, дури во осмиот круг на гласање меѓу повеќе од 1 000 пратеници и регионални делегати во Претставничкиот дом, Матарела во саботата вечерта освои 505 гласови потребни за избор. 80-годишниот Серџо Матарела претходно ја отфрли можноста да остане на функцијата, но бидејќи беше загрозена политичката стабилност на земјата, тој се предомисли по апелот на парламентарните лидери кои му се заблагодарија што се согласи да остане на функцијата.
Франција
Претседателските избори во Франција се означени како најважен настан во оваа 2022 година. Граѓаните на Франција ќе излезат на гласање на 10 и 24 април. Во игра се голем број кандидати, а се очекува за втор мандат да се кандидира и актуелниот претседател Емануел Макрон. Тој ќе има тешка задача, бидејќи голем број политичари и од левицата и од десницата сакаат да си замине.
Франција има големи шанси да ја добие првата жена на чело на земјата оваа година, бидејќи три дами – Марин Ле Пен, Валери Пекрес и Ана Идалго имаат добар рајтинг како потенцијални кандидати кои би можеле да бидат во вториот круг од изборите со Макрон.
Унгарија
Во април и во Унгарија се закажани избори кои би можеле значително да го променат имиџот на земјата. Виктор Орбан е познат како „црна овца“ во Европа и годинава ќе се бори за нов премиерски мандат. Тој имаше многу судири со раководството на ЕУ во текот на претходните години, што доведе до критики и стравувања кај лидерите на Унијата, кои сега се надеваат дека десничарската влада ќе стане минато во Унгарија.
Човекот кој може да го промени тоа, Петер Марки-Зај, доаѓа од редовите на конзервативците и претставува заеднички кандидат на опозицијата. Тој верува во своите шанси и верува дека опозицијата може да го победи Орбан и да ја одведе Унгарија до нова реалност.
Босна и Херцеговина
Општите избори во Босна и Херцеговина ќе се одржат на 2 октомври 2022 година. Тие ќе одлучат кој ќе седне во Претседателството на БиХ, како и во националните, ентитетските и кантоналните влади. На претседателските избори секоја национална заедница ќе избира свој член на Претседателството, а сегашни членови се Шефик Џаферовиќ, Жељко Комшиќ и Милорад Додик.
Претходната година донесе многу кризи, конфликти, бојкоти на институциите, што ја направи политичката состојба во државата нестабилна и проблематична за граѓаните.
Доколку некој од опозицијата во Република Српска победи на изборите, тоа би било голем удар за Додик. Потпретседателката на Партијата за демократски напредок (ПДП), Јелена Тривиќ, настапува заедно со владејачката Сојуз на независни социјалдемократи (СНСД) на изборите во Република Српска.
Словенија
Словенија годинава ја очекуваат претседателски и парламентарни избори. Претседателската функција ќе трае до октомври, но Борут Пахор, актуелниот претседател, нема да може да се кандидира за нов мандат. Претседателот се избира во два изборни круга, доколку ниту еден кандидат не освои мнозинство во првиот круг. Досега ниту еден кандидат не се истакнал како можен наследник на Борут Пахор на таа позиција.
Парламентарните избори би можеле да бидат многу понеизвесни, особено поради односот на ЕУ кон Словенија. Другиот европски десничар, Јанез Јанша, беше жестоко критикуван од лидерите на ЕУ и неговиот народ.
Демонстрациите на улиците во Словенија го одбележаа крајот на претходната година, а граѓаните му порачаа на Јанша – време е за промени.
Доколку добие уште еден мандат, тешко дека ќе се промени политичката ситуација во Словенија. Се разбира, тогаш прашањето е дали ЕУ ќе го заостри односот кон таа земја.
Австрија
Претседателските избори во Австрија треба да се одржат оваа година, некаде помеѓу септември и декември 2022 година. Актуелниот претседател Александар Ван дер Белен има право на уште еден мандат.
Истражувањата покажуваат дека тој има голема поддршка од јавноста, бидејќи дури 68 отсто од гласачите се задоволни од неговата работа.
Овие избори би можеле да бидат клучни поради внатрешно-политичката ситуација во Австрија. Земјата помина низ голема афера минатата година кога беше покрената истрага против поранешниот канцелар Себастијан Курц, поради што тој поднесе оставка и се повлече од политиката.