Муслиманите во Македонија самите да одлучат дали ќе одат на молитва во џамија или истата ќе ја вршат од дома. Ова е пораката од Исламската верска заедница до верниците на прашањето на „360 степени“ – како ќе се постапува особено за петочната молитва на која во џамиите се собираат најголем број на верници.
„И во минатото имавме многу различни болести, но, не се сеќаваме дека џамиите се затворија. Молитвата е лична, индивидуална за секоја личност и цениме дека самите луѓе треба да бидат совесни дали ќе одат во џамија, или ќе се молат дома“.
велат од ИВЗ за „360 степени“.
Оние мерки што ИВЗ веќе ги презеде, се јавно истакнати на нивната интернет страница уште вчера. Пораката од Реисот Сујелман Реџепи е да се прекине наставата во медресата „Иса Бег“ во скопско Кондово и на Факултетот за исламски науки во Скопје.
Во Албанија, Исламската заедница не исклучува и привремено затворање и на џамиите
За разлика од Македонија, Исламската заедница во Албанија попладнево објави соопштение до верниците и на социјалните мрежи. Во него, прво се потенцира сериозноста на ситуацијата а потоа и се цитира пророкот Мухамед дека „кога ќе слушнете дека некаде има епидемија, не одете на тоа место“. Цитатот се користи за да се испрати порака:
„Карантинот и излегувањето без потреба е мерка за претпазливост што треба да се преземе во вакви случаи“,
се вели во дел од соопштението на Исламската заедница на Албанија.
Потоа, Исламската заедница соопштува дека од муфтиите се побарани четири мерки за претпазливост:
- муфтиите и нивните помошници активно да придонесат во кревањето на свеста кај верниците за коронавирусот, а на старите и на лицата со хронични заболување да ги советуаат да вршат верски ритуали по дома;
- да се намалат масовните собири, како предавања, курсеви и разни активности во џамиите. Зависно од состојбата во вашето место на живеење, да се откаже и петочната молитва;
- секојдневните молитиви, се препорачува, да не се вршат групно и организирано. Во исто време „езанот“ да остане во исто време за сите џамии;
- строго да се почитуваат и спроведуваат сите пропораки дадени од релевантните власти во нашата земја како и од Светската здравствена организација.
Соопштението на Исламската заедница на Албанија завршува со молитва, ситуацијата да помине без последици за сите граѓани на земјата.
*поврзана вест: Г. Тимотеј за причеста и коронавирусот: Оние што не се плашат и имаат вера нека дојдат, оние што имаат грип нека ги следат препораките